Հարգելի´ հայրենակիցներ,

75 տարի առաջ որոշում ընդունվեց զարգացնելու ուռուցքաբանությունը և ստեղծելու քաղցկեղի ուսումնասիրման և բուժման գիտահետազոտական կառույց: Այդ տարիների ընթացքում՝ կայացման ճանապարհին, անխուսափելի մարտահրավերներին դիմակայելով, կառուցվել է մեր կենտրոնը՝ գիտակցելով մեր երկրում ապրող քաղաքացու առողջության ու կյանքի բարձր որակի ապահովման կարևորությունը: Ուռուցքաբանության զարգացումը մեծագույն երազանք էր, որի իրականացումը պրոֆեսիոնալ բժիշկների համառ պայքարի ու գաղափարական նվիրումի արդյունք է:

Այդ ճանապարհին իրենց անխախտ և հիմնաքարային դերն են ունեցել աշխատանքին նվիրված մասնագետները, պացիենտներին նվիրված բժիշկները, գիտությանը նվիրված պրոֆեսորները: Նրանց ավանդը անգնահատելի է և հիմք՝ այսօրվա զարգացման համար:

Ուռուցքաբանությունը բժշկության մեջ ամենաբարդ բնագավառներից է: Այն լի է խնդիրներով, բարդություններով: Մենք հաստատակամ ենք իրականացնելու հետևողական քայլեր՝ ուղղված դրանց լուծմանը:

Գոհունակությամբ պետք է ընդգծեմ՝ մեր կենտրոնը ուռուցքաբանության բոլոր ոլորտներում իրականացնում է աննախադեպ լայնածավալ բարեփոխումներ՝ իր արժանի տեղը զբաղեցնելով համաշխարհային մեծ ընտանիքում:

Վստահ եմ՝ մենք հասնելու ենք այնպիսի փուլի, երբ քաղցկեղ ունեցող քաղաքացու բուժումը ամբողջությամբ իրականացվելու է մեր երկրում: Դրան հասնելու ենք, մասնավորապես, նոր սարք-սարքավորումների ձեռք բերումով, բժիշկների վերապատրաստումներով, տարբեր աշխարահռչակ մասնագիտացված կենտրոնների հետ համագործակցումներով: Բայց, որ ամենից առաջնայինն է, մեր բնակչության մեջ պետք է արմատացնել պարբերաբար ստուգումների, հիվանդությունների վաղ կանխարգելումների կարևորությունը:

Այժմ, Ուռուցքաբանության ազգային կենտրոնը 75 տարեկան է:

Ամեն նոր տարեդարձով ավելի պետք է ամրապնդվի մասնագիտացված բուժհաստատության դերը երկրում, ամեն նոր տարեդարձով պետք է կատարվեն համեմատականներ և ամրագրվեն փոփոխություններ՝ հանուն Հայաստանի քաղաքացիների առողջության, երկարակեցության, ուռուցքաբանության հարատև զարգացման:

Այդ զարգացումը պահանջում է յուրաքանչյուրիս անհատական ներդրումն ու նվիրումը:

Սիրելի՛ հայրենակից,

Ուռուցքաբանության ազգային կենտրոնը անում է ամեն ինչ՝ քո առողջության և երկարակեցության համար:

Որպես նպատակ՝ ՁԵՐ ԱՌՈՂՋՈՒԹՅՈՒՆԸ

Որպես միջոց՝ ՄԵՐ ԱՇԽԱՏԱՆՔԸ

ՍԻՐՈՎ՝ ՈՒԱԿ տնօրեն Նարեկ Մանուկյան