Պացիենտների համարԽորհուրդներ քաղցկեղով հիվանդներին
Հետդաշտանադադարի շրջանում ճարպի ցածր պարունակությամբ սննդակարգը նվազեցնում է կրծքագեղձի քաղցկեղից մահացությունը
Հետդաշտանադադարի շրջանում ճարպի ցածր պարունակությամբ սննդակարգը նվազեցնում է կրծքագեղձի քաղցկեղից մահացությունը
02.06.2016

Կանայք, ովքեր հետդաշտանադադարի շրջանում նվազագույնը ութ տարի հետևում էին ճարպի ցածր պարունակությամբ սննդակարգին, կարողացան նվազեցնել մահվան ռիսկը կրծքագեղձի քաղցկեղի ագրեսիվ ուռուցքներից: Միաժամանակ, նման սննդակարգը մեծացնում էր ապրելիությունը այն կանանց համեմատ, ովքեր սնվում էին՝ առանց հետևելու նմանատիպ սննդակարգի: Այսպիսի հետևությունների է հանգել Լոս-Անջելեսի Կենսաբժշկական հետազոտական ինստիտուտի գիտնականների աշխատանքը:

Մոտավորապես 50 տարի առաջ ճարպերի ընդունման և կրծքագեղձի քաղցկեղի զարգացման միջև նման կապի մասին արդեն հնչել էր գիտական հանրության շրջանում, սակայն դիտարկումներից  ստացված արդյունքները համոզիչ չէին: Կրծքագեղձի քաղցկեղի զարգացման և  ընթացքի վրա ճարպի տարբեր պարունակությամբ սննդակարգերի ազդեցությունը որոշելու նպատակով բ.գ.դ. Rowan Chlebowski-ն իր թիմով իրականացրեց ռանդոմիզացված կլինիկական փորձարկումների լրացուցիչ ուսումնասիրություն, որոնց մասնակցում էին հետդաշտանադադարի շրջանում գտնվող 48 835 կին: Հիշենք, որ հետդաշտանադադարն սկսվում է դաշտանադադարի ավարտից հետո մինչև 65-69 տարեկանը:
 
Այս հետազոտությանը մասնակցում էին 50-79 տարեկան կանայք, որոնց մոտ կրծքագեղձի քաղցկեղ չէր հայտնաբերվել, ունեին մամոգրաֆիայի նորմալ տվյալներ, և նրանց սնուցումը համապատասխանում էր ճարպի պարունակության նորմալ ցուցանիշներին:

Բոլոր մասնակիցներից 19 541 կին տեղափոխվեց ճարպի ցածր  պարունակությամբ սննդակարգի, որն ապահովվում էր սննդաբանի հետ խմբային պարապմունքների օգնությամբ: Այս կանանց սննդակարգում ճարպը կազմում էր սննդային ամբողջ էներգետիկ ծավալի մոտավորապես 20%-ը,  և սննդաբանները կանանց ուշադրությունն ուղղում էին մրգերի, բանջարեղենի և հատիկավոր մթերքի ընդունման ավելացման վրա: Մնացած  29 294 կանայք սնվում էին իրենց համար սովորական սննդով՝ առանց որևէ փոփոխության:

 

Մոտավորապես ութ տարի հետո ճարպի ցածր պարունակությամբ սննդակարգի վրա գտնվող կանանցից 1 767-ի մոտ կրծքագեղձի քաղցկեղ ախտորոշվեց: Գիտնականները համեմատեցին այս կանանց ապրելիության ժամանակը կրծքագեղձի քաղցկեղով այլ կանանց հետ, և հայտնաբերեցին, որ ախտորոշման պահից ընդհանուր ապրելիությունը 4%-ով ավելի բարձր էր ճարպի ցածր պարունակությամբ սննդակարգին հետևող խմբում (82%` ընդդեմ 78%-ի):
 
«Սա առաջին դեպքն է, երբ մենք ուսումնասիրեցինք ապրելիությունը կրծքագեղձի քաղցկեղի ախտորոշումից հետո՝ փորձարկվողների այսպիսի խմբում, և հայտնաբերեցինք, որ ճարպի ցածր պարունակությամբ սննդակարգի վրա մշտապես գտնվելը մեծացնում է հետդաշտանադադարի շրջանում գտնվող կանանց ապրելիությունը», - ասաց բժիշկ Chlebowski՝ ներկայացնելով իր աշխատանքի արդյունքները: «Մեր հետևությունները ցույց են տալիս նաև, որ կանայք պետք է մնան ճարպի ցածր պարունակությամբ սննդակարգի վրա, որպեսզի օգտվեն նմանատիպ սնուցման առավելություններից»:

Գիտնականները հայտնել են նաև, որ կրծքագեղձի չարորակ ուռուցքների բնութագրերի մեծ մասը՝ ուռուցքի չափը, տեղակայումը և ուռուցքի ագրեսիվության տեսակը ներառյալ (եռակի բացասական քաղցկեղ և her2 դրական ուռուցք), կանանց երկու խմբում էլ գրեթե նույնն էր: Սակայն ճարպի ցածր պարունակությամբ սնունդ ընդունող կանանց խմբում պրոգեստերոնի ռեցեպտորների քանակն ավելի քիչ էր՝ 28.4%` ընդդեմ 33%-ի: Բացի այդ, հետազոտողները նշեցին, որ ճարպի ցածր պարունակությամբ սնվող կանանց խմբում սիրտ-անոթային հիվանդություններից մահացությունն ավելի ցածր է:

 

Լուրեր, հայտարարություններ
Այսօր մանկական քաղցկեղի դեմ պայքարի միջազգային օրն է 15.02.2021

Ուռուցքաբանության ազգային կենտրոնը ևս միանում է այդ արշավին։ Մենք գիտենք, որ ցանկացած ծնողի համար ամենասարսափելի ախտորոշումներից մեկը քաղցկեղն է։ Բայց միշտ հիշեք, որ քաղցկեղն ընդամենը հիվանդություն է, և այն բուժելի է։

«Հարցրու բժշկին». Ի՞նչ է իմունոհիստոքիմիական հետազոտությունը, ո՞ր դեպքերում է այն անհրաժեշտ 10.02.2021

NEWS.am Medicine-ի հերթական հաղորդման հյուրն է Ուռուցքաբանության ազգային կենտրոնի Կլինիկական պաթոմորֆոլոգիայի բաժանմունքի վարիչ ԶԱՐՈՒՀԻ ՀԱՐՈՒԹՅՈՒՆՅԱՆԸ:

Հայկական Ուռուցքաբանական Կոնգրես՝ վաղուց սպասված հանդիպում 09.02.2021

Բացման խոսքում ՈւԱԿ-ի տնօրեն Նարեկ Մանուկյանը նշեց՝ կա մի գործոն, որը խթանել է ուռուցքաբանության զարգացումը Հայաստանում վերջին 20 տարիներին, և այդ գործոնը մրցակցությունն է։

Հաճախ տրվող հարցեր