Նորություններ
Հերթական բարդ վիրահատությունը Ուռուցքաբանության ազգային կենտրոնում՝ բերանըմպանի տեղային-տարածված ուռուցքի արմատական հեռացում
Հերթական բարդ վիրահատությունը Ուռուցքաբանության ազգային կենտրոնում՝ բերանըմպանի տեղային-տարածված ուռուցքի արմատական հեռացում
06.05.2020

ՀՀ ԱՆ Բ․Ա․ Ֆանարջյանի անվան Ուռուցքաբանության ազգային կենտրոնում կատարվել է հերթական բարդ վիրահատությունը․ բերանըմպանի տեղային-տարածված ուռուցքի արմատական հեռացում՝ պարանոցի բոլոր մակարդակների ավշահանգույցների հետ միասին։ Այս տեղակայման ուռուցքների դեպքում նման վիրահատությունները կատարվում են բավականին հազվադեպ:

 

Երիտասարդ տղամարդու մոտ ախտորոշվել էր բերանըմպանի տարածուն նորագոյացություն, որն ախտահարել էր քմային նշիկը ձախից, քմային աղեղները և հասել մինչև լեզվարմատի ձախ կողմնային մակերես։ Ագրեսիվ ուռուցքը, տեղային տարածվածությունից բացի, լայն ծավալով ախտահարել էր նաև պարանոցային ավշահանգույցները։ Մյուս օրգաններում երկրորդային փոփոխություններ չեն հայտնաբերվել: Դեպքը բազմիցս քննարկվել է բժիշկների մուլտիդիսցիպլինար խմբի կողմից, անցկացվել են նախավիրահատական քիմիաթերապիայի կուրսեր, որից հետո որոշում է կայացվել կատարել վիրահատական բուժում:

 

Վիրահատությունը կատարվել է դիմածնոտային վիրաբույժների հետ համատեղ՝ պրոֆեսոր Գրիգորի Խաչատրյանի գլխավորությամբ, ՈՒԱԿ Ընդհանուր և մանկական ուռուցքաբանության և ռեկոնստրուկտիվ վիրաբուժության բաժանմունքի քիթ-կոկորդ-ականջաբանության ծառայության ղեկավար Արտակ Պողոսյանի, ուռուցքաբան-քիթ-կոկորդ-ականջաբան Արմինե Զարգարյանի մասնակացությամբ:

 

Վիրահատությունը կատարվել է երկու փուլով՝ մոտ 6 ժամ տևողությամբ:

 

Սկզբում հեռացվել են պարանոցային ավշահանգույցները՝ կատարվել է մոդիֆիկացված արմատական լիմֆոդիսեկցիա, որի ժամանակ պահպանվում են պարանոցի կենսական կարևոր անատոմիական կառուցվածքներ:

 

 

Այնուհետև կատարվել է վիրահատության երկրորդ փուլը միջստործնոտային (տրանսմանդիբուլյար) մուտքով, այսինքն, հատվել է ստորին ծնոտը՝ ապահովելով մուտք դեպի բերանըմպան։ Ամբողջությամբ հեռացվել է բերանըմպանի գոյացությունը առողջ հյուսվածքների սահմաններում, որից հետո բերանըմպանի և ծնոտի ամբողջականությունը վերականգվել է տեղային հյուսվածքներով։

 

Հետվիրահատական շրջանը ընթանում է հարթ, վերքերը ապաքինվում են, հիվանդի ընդհանուր վիճակը բավարար է: Լրիվ ապաքինումից հետո հիվանդը կստանա հետվիրահատական բուժում:

 

 

Լուրեր, հայտարարություններ
«ՍԹԻՎ ՋՈԲՍԸ ԵԿԱՎ ՇԱՏ ՈՒՇ»․ ԱՄԵՐԻԿԱՑԻ ԲԺԻՇԿԸ՝ APPLE-Ի ՀԻՄՆԱԴՐԻ, ՔԱՂՑԿԵՂԻ ԵՎ ԱՌՈՂՋՈՒԹՅԱՆ ՊԱՀՊԱՆՄԱՆ ՄԱՍԻՆ 03.06.2020

Ըստ Դևիդ Ագուսի, «քաղցկեղը բայ է, ոչ թե գոյական»։ «Դա մի բան է, որը մարմինն անում է, դա պրոցես է։ Մարմինը ոչ թե ստանում է քաղցկեղ, այլ արտադրում է այն»։

«Դա կարող էր վերջ տալ իմ կյանքին»․ 20-ամյա ֆուտբոլիստը պատմել է քաղցկեղի դեմ պայքարի մասին 30.05.2020

«Մանչեսթեր Յունայթեդ» ֆուտբոլային ակումբը հայտնել է պաշտպան Մաքս Թեյլորի հետ պայմանագիրը երկարաձգելու մասին։ Ֆուտբոլիստը ակումբի համակարգում է 14 տարեկանից, բայց դեռ ոչ մի անգամ չի խաղացել...

Մեզի մուգ գույնը կարող է վկայել ենթաստամոքսային գեղձի քաղցկեղի մասին 29.05.2020

Վաղ փուլերում ենթաստամոքսային գեղձի քաղցկեղը սովորաբար իրեն զգացնել չի տալիս: Սակայն, ինչպես քաղցկեղի այլ տեսակների, այնպես էլ այս քաղցկեղի ժամանակին ախտորոշումն անչափ կարևոր է բուժման...

Հաճախ տրվող հարցեր