ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնի վիրահատարանը ժամանակակից լապարասկոպիկ սարքավորումներով վերազինելուց հետո ուրոլոգիական բաժանմունքի բժիշկները երիկամների ուռուցքային հիվանդության կապակցությամբ վերջին վիրահատությունները հաջողությամբ իրականացրել են լապարասկոպիկ եղանակով:
Հիվանդների մոտ հայտնաբերվել էր երիկամի ամբողջական ախտահարում ուռուցքային գոյացությամբ և ցուցված էր երիկամի արմատական հեռացում:
Լապարասկոպիկ եղանակը հնարավորություն է ընձեռում առանց կտրվածքի՝ մի քանի անցքերով անցկացված գործիքներով, ճշգրիտ սահմաններով, արմատականորեն հեռացնել երիկամը շրջակա ճարպաբջջանքի հետ միասին:
Վիրահատությունները հաջողությամբ կատարել է բաժանմունքի վարիչ Կարեն Ծառուկյանը, ասիստենտ՝ բժիշկ-ուրոլոգ Ազատ Չախոյան:
Հիվանդները մի քանի օր անց դուրս են գրվել հիվանդանոցից բավարար վերականգնվածությամբ: