Մեր մասին
Ընդունարան եվ Ամբուլատորիա
Ախտորոշման ծառայություն
Լաբորատոր հետազոտություններ
Կլինիկա
Տեսասրահ
Հետադարձ կապ
Տաջիկստանի առողջապահության նախարարության Ուռուցքաբանության հանրապետական գիտական կենտրոնի բժիշկ Մոհինիսո Սատտորովան ճառագայթային թերապիայի ոլորտում կատարելագործման դասընթաց է անցնում ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնում։ Դասընթացը կազմակերպվել է Ատոմային էներգիայի միջազգային գործակալության (ԱԷՄԳ) հետ տեխնիկական համագործակցության Տաջիկստանի ազգային ծրագրի շրջանակում։
ՈւԱԿ-ի Ճառագայթային թերապիայի բաժանմունքի ղեկավար Թաթուլ Սաղաթելյանի խոսքով, ԱԷՄԳ-ի այդ ծրագրի շրջանակում Տաջիկստանն ու Հայաստանը համագործակցում են մի քանի տարի, և ճառագայթային թերապիայի ոլորտում հայ մասնագետների փորձին արդեն ծանոթացել են երեք բժիշկ, չորս տեխնիկ և մեկ բժշկական ֆիզիկոս այդ երկրից։ Հայաստանում կատարելագործվել են նաև բժիշկներ Ուզբեկստանից, նույնպես իրենց ազգային ծրագրի շրջանակում։
«Մենք կազմել ենք մեկ ամսվա ծրագիր, որով բժիշկ Սատտորովան ուսումնասիրում է տարբեր տեղակայումների ուռուցքների ճառագայթային բուժումը, ապացուցողական բժշկության մոտցումները ճառագայթային թերապիայի ոլորտում», - ասաց նա։
Ծրագրի շրջանակում ավելի վաղ Դուշանբեում կազմակերպվել էին թրեյնինգներ, որոնց Թաթուլ Սաղաթելյանը հրավիրված էր որպես ԱԷՄԳ-ի փորձագետ և դասախոս։
Ինչպես պատմեց Մոհինիսո Սատտորովան, ԱԷՄԳ-ի հետ տեխնիկական համագործակցության շրջանակում Տաջիկիստանում արդիականացվել են սարքավորումները՝ Դուշանբեի կոբալտային ապարատը բարելավվել է, իսկ Հուջանդ քաղաքում տեղադրվել է նոր ճառագայթային սարք։ Անցում է կատարվել բուժման 2D պլանավորումից 3D-ի, այսինքն ճառագայթային թերապիայի ավելի ճշգրիտ մեթոդների կիրառման, ինչը և սովորեցնում են տաջիկ մասնագետներին Հայաստանում։
Մոհինիսոյի խոսքով, Հայաստանում ինքն իրեն շատ լավ է զգում, անգամ հայերեն մի քանի արտահայտություն է սովորել, իսկ «հա» և «ջան» բառերն իրեն ի սկզբանե հասկանալի էին, ուղղակի տաջիկերեն «ջանը» հնչում է «ջոն»։
