Մեր մասին
Ընդունարան եվ Ամբուլատորիա
Ախտորոշման ծառայություն
Լաբորատոր հետազոտություններ
Կլինիկա
Տեսասրահ
Հետադարձ կապ
Ուռուցքաբանության ազգային կենտրոնը հավատարիմ է իր ավանդույթներին. մենք շարունակում ենք միջազգային գործընկերների հետ նոր կապերի հաստատումը, հանդիպումներն ու քննարկումները՝ ի նպաստ հիվանդությունների բուժման նորարարական մեթոդների ծանոթացմանը և կիրառմանը:
Այդ նպատակով էլ ՈւԱԿ-ը, համագործակցելով «Շինոն» կազմակերպության հետ, մասնակցել է կարևոր բժշկական համաժողովների:
«Շինոն» կազմակերպությունը առաջատար է աշխարհում և համագործակցում է ավելի քան 400 բժշկական կենտրոնների հետ։ Վերջերս, այդ ընկերությունը ուռուցքաբանության ոլորտի մասնագետների համար կազմապերպել էր հանդիպում-քննարկումներ՝ աշխարհի գերզարգացած մասնագիտացված 3 կլինիկաներում՝ Հնդկաստանի «Apollo Proton Cancer Centre»-ում , Դուբայի «American Hospital»-ում և Աբու Դաբիի «Burjeel Hospital»-ում:
Հանդիպումներին Հայաստանի կողմից ներկա է եղել Ուռուցքաբանության ազգային կենտրոնի Ճառագայթային գինեկոլոգիայի բաժանմունքի ղեկավար, բ.գ.դ., պրոֆեսոր Էվելինա Բախշինյանը:
Այցի տպավորություններով կիսվելիս՝ բժիշկը մասնավորապես կարևորեց ճառագայթային գերժամանակակից՝ պրոտոնային թերապիայի ներկայացումը, որը կատարվում է Հնդկաստանի «Apollo Proton Cancer Centre»-ում: Այս կենտրոնը առաջինն ու միակն է Հարավային Ասիայում և Միջին Արևելքում, որտեղ բուժում են ստանում ավելի քան 35 երկրների բուժառուներ: Պրոտոնային թերապիայի առավելությունները շատ են,ամենակարևորը՝ նրա շնորհիվ հնարավոր է թիրախին տալ մաքսիմալ թումորոցիդ ճառագայթում՝ նվազեցնելով ճառագայթային դոզան շրջակա առողջ հյուսվածքների և օրգանների վրա:
Պրոտոնային թերապիան կիրառվում է տարբեր ուռուցքային տեղակայումների դեպքում՝ կենտրոնական նյարդային համակարգի (աստրոցիտոմա, խոնդրոսարկոմա,խոնդրոմա, գլիոմա, մեդուլոբլաստոմա և այլն), ոսկրերի և փափուկ հյուսվածքների (խորդոմա, փափուկ հյուսվածքների և Էվինգի սարկոմա,խոնդրոսարկոմա և այլն), թոքերի, գլխի և պարանոցի, ողնաշարի, ստամոքսաղիքային համակարգի (կերակրափող, լյարդ),շագանակագեղձի և գինեկոլոգիական քաղցկեղների դեպքում:
Հաշվի առնելով պրոտոնային թերապիայի առավելությունը՝ երկրորդային ազդեցությունների բացակայությունը, համեմատ ավանդական ճառագայթային բուժմանը, այն հնարավորություն է տալիս լայնորեն օգտագործել նաև երեխաների բարորակ և չարորակ նորագոյացությունների բուժման ժամանակ:
Կենտրոնում փոքրիկ բուժառուների համար նաև օգտագործվում է «Pencil beam scanning» մեթոդը, որն ավելի գերճշգրիտ և արդյունավետ է պրոտոնային թերապիայի մեջ:
Այցերի ընթացքում ձեռք են բերվել պայմանավորվածություններ ինչպես բժշկական կենտրոնների, այնպես էլ այցերին մասնակցած ոլորտային մասնագետների հետ:
