25 լրագրողներ, 10 ուռուցքաբան-մասնագետներ` մեկ վայրում. թեման՝ ոլորտում առկա հարցերը
Խնդիրները շատ են, առաջացած հարցերը թվում են անվերջ, նոր առաջարկվող լուծումների մասին քչերը գիտեն, զարգացման տեսլականը՝ նույնպես: Հենց սրանք շտկելու համար Ուռուցքաբանության ազգային կենտրոնը ոչ աշխատանքային օրերին կազմակերպեց արտագնա սեմինար-քննարկում ու հրավիրեց հասարակության հետ ամենաշատն առնչվող և բողոք-խնդիրներին ծանոթ մարդկանց՝ լրագրողներին:
Սեմինար-քննարկման թեման էր «Հայաստանում ուռուցքաբանության ոլորտի հիմնախնդիրների լուսաբանման արդիականությունը»:
Երկօրյա հանդիպման ժամանակ լրագրողներին ներկայացվեցին ուռուցքաբանության ոլորտում առկա խնդիրները, դրանց լուծման տարբերակներն ու ռազմավարությունները։ Քննարկվեցին խնդրահարույց այնպիսի թեմաներ, ինչպիսիք են դեղորայքային բուժումը, ոլորտում պետության կողմից իրականացվող ծրագրերը: Անդրադարձ եղավ ուռուցքային հիվանդությունների տարածվածությանը Հայաստանում, դրանց ախտորոշման և բուժման հնարավորություններին, կանխարգելելու տեսլականին:
Ուռուցքաբանության ազգային կենտրոնը կարևորում է լրագրողների դերը Հայաստանի առողջապահության կարևորագույն ոլորտներից մեկում: Կնետրոնը լիահույս է՝ հիվանդության մասին գրագետ լուսաբանումը, խնդիրների բարձրաձայնումը, հիվանդության կարխարգելիչ միջոցառումներին տեղյակ լինելն ու դրանց ներկայացումը հասարակությանը կօգնեն ավելի հետևողական լինել սեփական առողջության նկատմամբ, զարկ կտան պարբերաբար ստուգումներին և չարաբաստիկ հիվանդության` առավել արդյունավետ և թիրախային կանխարգելմանը:
