Ուռուցքաբանության ազգային կենտրոնի մասնագետները շատ հաճախ պատասխանատվություն են ստանձնում կատարելու այնպիսի վիրահատություններ, որոնցից հրաժարվում են անգամ արտերկրում։ 

Նորագույն սարքավորումները, մասնագետների պարբերաբար վերապատրաստումները ՈՒԱԿ-ի Նեյրոօնկոլոգիական բաժանմունքին հնարավորություն են տալիս կատարել ինչպես ուռուցքային, այնպես էլ ոչ ուռուցքային բոլոր տեսակի ներյովիրաբուժական միջամտություններ։

2022 թվականից սկսած, ողնաշարի ինֆեկցիոն-բորբոքային հիվանդությունների դեպքում ՈՒԱԿ-ում կատարվում են նորագույն մոտեցմամբ վիրահատական միջամտություններ։ Ողերում և միջողային սկավառակում վիրահատական այս տեսակի միջամտությունը ունի նվազագույն ռիսկեր և թույլ է տալիս ամբողջությամբ հաղթահարել հիվանդությունը՝ բուժառուներին վերադարձնելով քայլելու բերկրանքն ու լիարժեք կյանք վերադառնալու հնարավորությունը։ 

Վերջերս էլ կատարվեց հերթական՝ 4-րդ այսպիսի վիրահատությունը։ 

ՈՒԱԿ է դիմել 1961թ․ ծնված տղամարդ՝ գանգատվելով ողնաշարի գոտկային հատվածի ցավերից, զույգ ստորին վերջույթների թուլությունից, ախորժակի անկումից, քաշի կորստից, քրտնարտադրությունից։ Բուժառուն ուներ նաև ուղեկցող հիվանդություններ՝ 2010թ․-ին կատարել են սրտի բաց վիրահատություն, ունեցել է սրտամկանի ինֆարկտ, սրտի արտամղման ֆունկցիան 30% է (նորման՝ 55-70% ), առկա է շաքարային երկրորդ տիպ դիաբետ՝ ինսուլինկախյալ ձևով, շագանակագեղձի ադենոմա։

Տղամարդն իրեն հիվանդ էր համարում մոտ 6 ամիս։ Գանգատների կապակցությամբ ՌԴ-ում հոսպիտալացվել է քաղաքային հիվանդանոցներից մեկի նեյրովիրաբուժական բաժանմունքում, որտեղ ստացել է կոնսերվատիվ հակաբակտերիալ բուժում, բուժման ընթացքում զարգացել է նեյրոգեն միզակապություն, տեղադրվել է էպիցիստոստոմա․ հաշվի առնելով հիվանդի մոտ պրոգրեսիվող նյարդաբանական դեֆիցիտը՝ նրան պլանավորվել է ուրգենտ դեկոմպրեսիայի, սակայն զարգացած ստորին վերջույթի թրոմբոզի կապակցությամբ վիրահատական միջամտությունը 2 շաբաթ հետաձգվել է։

6 ամսվա բուժման ընթացքում դրական դինամիկա չի գրանցվել։ Հաշվի առնելով նյարդաբանական դեֆիցիտի և սուր ցավային սինդրոմի պահպանումը՝ հիվանդը տեղափոխվել է Հայաստան և դիմել Ուռուցքաբանության ազգային կենտրոնի Նեյրոօնկոլոգիական բաժանմունք։

Կատարված հետազոտությունների արդյունքում ախտորոշվել է Լ1-Լ2 սպոնդիլոդիսցիտ՝ ողերի քայքայումով, էպիդուրիտ, ողնաշարի սեգմենտար անկայունություն, վիճակ Լ1 դեկոմպրեսիվ լամինէկտոմիայից հետո։

ՈՒԱԿ-ում կատարվել է վիրահատություն, որը տեսակով եզակի է Հայաստանում և անցկացվում է միայն Ուռուցքաբանության ազգային կենտրոնում։ Վիրահատության ընթացքում կատարվել է

• Լ1-Լ2 միջողային սկավառակի և ողերի քայքայված մասի ռադիկալ ռեզեկցիա և դեբրիդմենտ հետին մուտքով,
• Լ2 դեկոմպրեսիվ լամինէկտոմիա,
• Th11-Th12 L3-L4 տրանսպեդիկուլյար ֆիքսացիա,
• Լ1-Լ2 դեֆեկտի լրացում անտիբիոտիկով հագեցած ցեմենտով։

Վիրաբուժական թիմ՝ Կարապետ Անտոնյան, Ռուբեն Հարությունյան, օրդինատոր՝ Դանղյան Մամիկոն, անեսթեզիոլոգ՝ Արշակ Հարությունյան։

1 ամիս անց 62 տարեկան տղամարդը արդեն իսկ քայլում է ձեռնափայտով ՝ առանց միզային կատետրի։

Քայլում է ու վայելում իր բնականոն կյանքը։