ԱԷՄԳ 66-րդ գլխավոր կոնֆերանսին մասնակցել է նաև ՈՒԱԿ-ը
Վիեննայում կայացած Ատոմային էներգիայի միջազգային գործակալության (ԱԷՄԳ)/ International Atomic Energy Agency (IAEA)/ 66-րդ գլխավոր կոնֆերանսի շրջանակում կայացած ԱԷՄԳ գիտական ֆորումին մասնակցել են ՈՒռուցքաբանության ազգային կենտրոնի տնօրեն Նարեկ Մանուկյանը և Ճառագայթային ուռուցքաբանության բաժանմունքի ղեկավար Թաթուլ Սաղաթելյանը:
Ֆորումը նվիրված է եղել «Rays of Hope» ծրագրին առնչվող հարցերի քննարկմանը: Վերջինիս նպատակն է ցածրեկամուտ ունեցող երկրներում ճառագայթային բժշկության հասանելիության ապահովումը և բարձրացումը՝ ԱԷՄԳ-ի կողմից կազմակերպվող և անդամ երկրների կողմից ֆինանսական, տեխնիկական և մասնագիտական աջակցություն ենթադրող նախագծերի միջոցով:
Գիտական Ֆորումին, որպես հրավիրված բանախոս, ելույթով հանդես է եկել Թ. Սաղաթելյանը՝ ներկայացնելով զարգացող երկրներում ճառագայթային բժշկության ներդրման հետ կապված մարտահրավերները:
Կայացել է նաև աշխատանքային հանդիպում, որին մասնակցել են ԱԷՄԳ գլխավոր տնօրենի տեղակալ, Տեխնիկական համագործակցության վարչության ղեկավար Հաու Լիուն, ԱԷՄԳ Տեխնիկական համագործակցության վարչության Եվրոպայի բաժանմունքի տնօրեն Էվե Կուլի-Կալան, նույն բաժանմունքի Հայաստանի հարցերով պատասխանատու Կարմինա Խիմենեսը, ԱԷՄԳ Միջուկային կիրառությունների վարչության Մարդու առողջության բաժնի ներկայացուցիչ Ելենա Ֆիդարովան, ՀՀ կառավարությանն առընթեր Միջուկային անվտանգության կարգավորման պետական կոմիտեի փոխնախագահ Վահե Գրիգորյանը, ՀՀ ԱՆ Վ.Ա. Ֆանարջյանի անվան ՈՒռուցքաբանության ազգային կենտրոնի տնօրեն Նարեկ Մանուկյանը և կենտրոնի Ճառագայթային ուռուցքաբանության բաժանմունքի ղեկավար Թաթուլ Սաղաթելյանը:
Հանդիպման մասնակիցները քննարկել են ոլորտային կարևոր թեմաներ, ներկայացրել իրականացված և սպասվող ծրագրերը:
