Առաջին ալիքի Լուրերի անդրադարձը ՈւԱԿ-ում ստեղծված Քաղցկեղի ռեգիստրին
Քաղցկեղ ունեցող անձանց հիվանդության մասին տեղեկությունների հավաքագրում, պահպանում, կառավարում՝ առանց թղթաբանության. այս հնարավորությունը կտա քաղցկեղի ռեգիստրը (չարորակ գոյացությունների յուրաքանչյուր նոր դեպք այսուհետև պարտադիր պետք է գրանցվի Armed հավելվածի համապատասխան բաժնում):
Ուռուցքաբանության ազգային կենտրոնի տնօրեն Նարեկ Մանուկյանը փաստում է. «Եվս մեկ քայլով գնացինք առաջ, և ստեղծվեց քաղցկեղի ռեգիստրը, որի շնորհիվ կհավաքագրվի ճշգրիտ վիճակագրություն Հայաստանում քաղցկեղի մասին, ձեռք կբերվեն բավարար տեղեկություններ, կհայտնաբերվեն խնդիրներն ու կլուծվեն»:
ՈՒԱԿ-ի վիճակագրության և կլինիկական հետազոտությունների բաժնի ղեկավար Արևիկ Ստեփանյանը, շեշտադրելով քաղցկեղի ռեգիստրի կարևորությունը, առանձնացնում է հավելվածի պրակտիկությունը. «Հիվանդները ստիպված չեն լինի մի բժշկից մյուսի մոտ գնալիս տանել իրենց հիվանդության բոլոր թղթերը. այդ ամենը կլինի հավելվածում»:
