Ներկայումս Հայաստանում արդեն ստեղծվում է ուռուցքային հիվանդների ռեեստր: Այդ մասին NEWS.am Medicine-ի թղթակցի հետ զրույցում հայտնել է Ուռուցքաբանության ազգային կենտրոնի փոխտնօրեն Արթուր Ավետիսյանը` մեկնաբանելով Հայաստանում հետազոտություններ անցկացնող Հարվարդի հանրային առողջապահության դպրոցի օրդինատորների վերջերս կատարած առաջարկը:

Նա նշել է, որ եթե ավելի ճշգրիտ ներկայացնենք, նման ռեեստր գոյություն ունի, պարզապես ներկայում բոլոր տվյալները թվայնացվում են, եւ մոտավորապես վեց ամիս անց մենք ուռուցքային հիվանդների ժամանակակից տվյալների բազա կունենանք, որը վիճակագրական վերլուծության ավելի լայն հնարավորություններ կընձեռի: Նա հայտնել է, որ աշխատանքներ են տարվում Հայաստանի Առողջապահության նախարարության հետ համագործակցությամբ:

Հարվարդի Հանրային առողջության դպրոցից Ակհիլա Աննամրեդդին եւ Ջոն Սքոթը NEWS.am Medicine-ի թղթակցի հետ զրույցում ասել էին, որ ուռուցքային հիվանդների ռեեստրն անհրաժեշտություն է զարգացած առողջապահական համակարգով յուրաքանչյուր երկրի համար, որովհետեւ այն կարող է զգալիորեն օգնել ինչպես բժիշկներին, այնպես էլ առողջապահության կազմակերպման ոլորտի մասնագետներին: