Հետաքրքիր դեպքեր ճառագայթաբանի պրակտիկայից
Առաջին նկարի վրա պատկերված է 18 ամյա երիտասարդի որովայնի ուլտրաձայնային հետազոտության պատկերը (ՈւՁՀ), որի մոտ հայտնաբերվել է լեղապարկի բավականին հազվադեպ հանդիպող ախտաբանություն։
ՈւԱԿ-ի Ախտորոշման ծառայաության բժիշկ- ճառագայթաբան Կարինե Խոնդկարյանի խոսքով՝ երիտասարդը հիվանդանոց է ընդունվել լյարդի կիստայի կասկածով, սակայն ՈւՁՀ-ի արդյունքում լյարդում փոփոխություններ չեն հայտնաբերվել։
Պարզվել է, որ պացիենտի մոտ բնածին և շատ հավագյուտ ախտաբանություն է՝ բազմախտրոց լեղապարկ։ Բժշկի խոսքով տվյալ պահին երիտասարդի առողջությանը վտանգ չի սպառնում, բայց հետագայում, եթե խտրոցները խոչընդոտեն լեղու հոսքին, կարող է զարգանալ լեղաքարային հիվանդություն։
Երկրորդ նկարում երևում է ՈւՁՀ հետազոտությամբ լյարդում հայտնաբերված միակ 9 սմ հսկա մետաստազը, որը նախկինում ունեցած, բայց արդեն վիրահատված հաստ աղու չարորակ նորագոյացության արդյունք է։
Ինչպես նշեց Կարինե Խոնդկարյանը, մետաստազները սովորաբար ավելի փոքր են լինում։ Այսպիսի չափսերի, որպես կանոն, լինում է առաջնային ուռուցքը, սակայն այս դեպքում խոսքը գնում է հենց քաղցկեղի մետաստազի մասին։ Այժմ պացիենտը պետք է ստանա քիմիաթերապևտիկ բուժում։
Երրորդ նկարում պատկերված է որովայնային աորտայի հսկա, մինչև 8,8 սմ լայնացած անևրիզմա՝ հեմատոմայով։
Պացիենտը հիվանդանոց է ընդունվել ստամոքսի քաղցկեղի կասկածով, սակայն ՈւՁՀ-ի արդյունքում հայտնաբերվել է լիովին այլ ախտաբանություն. աորտայի անևրիզմա։ Ախտորոշումը հաստատվել է նաև ԿՏ հետազոտությամբ (Նկ․ 4 և 5)։
Ինչպես նշեց Ախտորոշման ծառայության ղեկավար Արմենուհի Գալստյանը, պացիենտի մոտ հայտնաբերվել է որովայնային աորտայի անևրիզմա անցումով զստային զարկերակներ՝ քրոնիկ հեմատոմայով։ Պացիենտի հետագա վարման և բուժման տակտիկան արդեն պետք է որոշեն անոթային վիրաբույժները։
