Փետրվարի 4-ը քաղցկեղի դեմ պայքարի միջազգային օրն է։ «Արմենպրես» լրատվական գործակալության մամուլի կենտրոնում ՀՀ առողջապահության նախարարության բժշկական օգնության քաղաքականության վարչության պետ Քնար Ղոնյանը և ՀՀ ԱՆ Վ.Ա. Ֆանարջյանի անվան ուռուցքաբանության ազգային կենտրոնի կլինիկական ուռուցքաբան Նաիրա Ջանոյանն անդրադարձել են քաղցկեցի վիճակագրությանը Հայաստանում և աշխարհում, խոսել են կանխարգելման կարևորությունից, բուժման մեթոդներից և պետական ծրագրերից։

«Կարող ենք արձանագրել, որ մահացության տոկոսի իջեցում կա։ Այստեղ, իհարկե, մեծ դեր է խաղում քաղցկեղի վաղ հայտնաբերումը։ Հայաստանում կանանց մոտ ամենատարածվածը կրքագեղձի քաղցկեղն է, տղամարդանց մոտ՝ թոքի քաղցկեղը։ Ուզում եմ առանձնակի նշել, որ պացիենտները, որոնց ընտանիքներում քաղցկեղի հայտնաբերման մեկից ավելի դեպք է գրանցվել, կրկնակի ուշադիր լինեն և ավելացնեն ստուգումների հաճախականությունը»,- նշել է Նաիրա Ջանոյանը։

«2019 թվականից սկսած չարորակ նորագոյացության ախտորոշման դեպքում վիրահատություններն իրականացվում են անվճար՝ պետական պատվերի շրջանակում։ Այս պարագայում բնակչի սոցիալական կարգավիճակը կապ չունի։ Ցանկացած անձ, որն ունի նման ախտորոշում օգտվում է պետության կողմից երաշխավորված անվճար վիրահատական ծառայությունից»,- շեշտել է Քնար Ղոնյանը։

Հայաստանում քաղցկեղի բուժման հնարավորություններին անդրադառնալով՝ ՈՒԱԿ դեղորայքային ուռուցքաբանության բաժանմունքի ղեկավարը խոսել է Հայկական ուռուցքաբանական 5-րդ կոնգրեսի օտերերկրյա հատուկ հյուրերի արձագանքի մասին։ Նաիրա Ջանոյանը նշել է, որ այս հարթակը եկավ ապացուցելու, որ մենք ոչնչով չենք զիջում միջազգային մասնագետներին։

«Մեր հյուրերը ոչ թե պացիենտներին իրենց մոտ ուղորդելու խորհուրդ տվեցին, այլ արձանագրեցին, որ Հայաստանում լիարժեք բուժում կազմակերպելը հնարավոր է»,-  հավելել է Նաիրա Ջանոյանը։

Բանախոսները անդրադարձել են նաև կրծքագեղձի սքրինինգային ծրագրի արդյունքներին։ ՈՒԱԿ կլինիկական ուռուցքաբան Նաիրա Ջանոյանը հորդորել է կանանց ակտիվ ներգրավվել ծրագրում՝ մի կողմ թողնելով վախերն ու անհանգստությունները։

Այս պահին շարժական մամոգրաֆը Գեղարքունիքի մարզում է։

Ասուլիսն ամբողջությամբ կից՝