Ուռուցքաբանության ազգային կենտրոնում կրծքագեղձի քաղցկեղի մասին խոսվում է հաճախ՝ տարբեր հարթակներում, տարբեր մասնագետների և բուժառուների կողմից։ Մենք ունենք առաջ շարժվելու մեխանիզմ՝ լինել իրազեկ = լինել առողջ։

Հոկտեմբերի՝ կրծքագեղձի քաղցկեղի իրազեկման ամսվա շրջանակում Ուռուցքաբանության ազգային կենտրոնում կազմակերպվել էր մուլտիդիսցիպլինար կոնգրես։

Ավելի քան 2 ժամ տևած կոնգրեսի ընթացքում բանախոսները խոսել են կրծքագեղձի HER2 դրական քաղցկեղի բուժման արդի մոտեցումների մասին, անդրադարձ է կատարվել HER2 դրական վաղ փուլի կրծքագեղձի քաղցկեղ ունեցող բուժառուների թիրախային բուժման պետական ծրագրի արդյունքներին, ներկայացվել է մի շարք միջազգային կլինիկական հետազոտությունների արդյունքներ, ինչպես նաև կլինիկական դեպքեր՝ սեփական փորձից։

Մուլտիդիսցիպլինար կոնգրեսի ընթացքում ամփոփվել են տարբեր բուժումների արդյունքներն ու խոսվել է տեսլականի մասին։

Զեկույցներով հանդես են եկել կենտրոնի փոխտնօրեն, բ. գ. թ., մամոլոգ Արթուր Ավետիսյանը, Դեղորայքային ուռուցքաբանության բաժանմունքի ղեկավար, բ․գ․թ․ Նաիրա Ջանոյանը, քիմիաթերապևտներ բ․գ․թ․ Աննա Թադևոսյանը և Լուսինե Նանյանը, Հեռահար ճառագայթային թերապիայի բաժանմունքից բժիշկ Սերգո Մխիթարյանը։

Շարունակական կրթությունը, փորձի և գիտելիքների փոխանակումը ՈՒԱԿ-ի զարգացման հիմնասյուններից մեկն է։