ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնի Որովայնային և էնդովիրաբուժության բաժանմունքի ղեկավար Հմայակ Եփրեմյանը Հանրային ռադիոյի «Ես առողջ եմ» հաղորդմանն անդրադարձել է ստամոքսի քաղցկեղի ախտանշաններին, հիվանդության հետազոտման մեթոդներին և բուժման տարբերակներին։

«Ստամոքսի քաղցկեղի մասին խոսելիս, իհարկե, կարևոր է սննդակարգին անդրադառնալը։ Ցանկալի է օրվա ռացիոնում ավելի շատ ներառել մրգեր և բանջարեղեն, շոգեխաշած սնունդ՝ տապակածի փոխարեն»,- նշել է մասնագետը։

Ժառանգականության գործոնը շատ մեծ դեր ունի ստամոքսի քաղցկեղի դեպքում։

Խրոնիկ հիվանդությունները (գաստրիտ, ստամոքսի խոց), ալկոհոլի և ծխախոտի օգտագործումը, ապխտած և համեմված սննդամթերքի չարաշահումը հիվանդության զարգացման համար նույնպես նպաստավոր պայմաններ կարող են ստեղծել:

Fast food-ի մշտական առկայությունը սննդակարգում կարող է առաջացնել ստամոքսի բորոբոքումներ, ինչն էլ իր հերթին կարող է հանգեցնել ստամոասի քաղցկեղի։

Ստամոքսի բարորակ նորագոյացությունները՝ պոլիպները, ժամանակին չհեռացնելու, չբուժելու դեպքում քաղցկեղի առաջացումը նույնպես կանխատեսելի է։