ՀՀ ԱՆ Վ․ Ա․ Ֆանարջյանի Ուռուցքաբանության ազգային կենտրոնը և կենտրոնի մի քանի բուժաշխատողներ պարգևատրվել են Պաշտպանության նախարարության կողմից՝ 2020 թվականի 44-օրյա պատերազմի ժամանակ զինծառայողների կյանքը փրկելու համար։

Մասնավորապես, անէսթեզիոլոգ-ռեանիմատոլոգներ Մարինա Ափոյանը և Սահակ Գևորգյանը պարգևատրվել են պատվոգրերով, անեսթէզիոլոգ-ռեանիմատոլոգ Արա Պապյանը՝ «Դրաստամատ Կանայն» մեդալով, և վիրաբույժ Արտյոմ Սիմոնյանը՝ «Վազգեն Սարգսյան» մեդալով։

Պատվոգրեր են ստացել նաև վիրահատական բուժքույրեր Մարինե Մարտիրոսյանը և Հայկանուշ Զաքարյանը։

Նախարարության «Շնորհակալագրում», մասնավորապես ասված է․ «Մեր նորագույն պատմությունը հիշելու է 2020 թվականի սեպտեմբերի 27-ից Ադրբեջանի Հանրապետության կողմից Արցախի Հանրապետության դեմ սանձազերծած պատերազմի ընթացքում բուժաշխատողների անձնուրացության բազմաթիվ դրվագներ, երբ մոռանալով սեփական անձը՝ Դուք փրկում էիք հարյուրավոր կյանքեր»։