Ուռուցքաբանության ազգային կենտրոնի մասնագետները շարունակում են վերապատրաստվել և հմտանալ իրենց ոլորտում
Այսուհետ՝ վիրահատությունների նոր մասշտաբներ, տեսակներ, միջոցներ
Ուռուցքաբանության ազգային կենտրոնի մասնագետները շարունակում են վերապատրաստվել և հմտանալ իրենց ոլորտում:
Ս. Սեինյանի անվան ոսկրային ուռուցքաբանության բաժանմունքի դիմածնոտային վիրաբույժ Հայկ Բաբայանը դեկտերմբերն անցկացրել է Եվրոպայի թիվ մեկ ուռուցքաբանական հաստատությունում՝ Գյուստավ Ռուսի ուռուցքաբանական կենտրոնում:
Բժիշկը 4 շաբաթ շարունակ մասնակցել է գլուխ-պարանոցային տարաբնույթ վիրահատություններին (վերականգնողական վիրահատություն, էնդոսկոպիկ լազերային վիրահատություն և այլն), ուսումնասիրել հիվանդությունների բուժման մեթոդները, եղել մասնագիտական ժողովներին, քննարկումներին: Շարունակական կրթությունը ՈՒԱԿ մասնագետների համար նպատակային է. այսկերպ հնարավորություն է տրվում ավելացնելու գիտելիքները, ձեռք բերելու նոր մասնագիտական հմտություններ, ծանոթանալու հազվադեպ հանդիպող հիվանդությունների վիրահատական և բուժման մեթոդներին:
«Մենք ամրացնում ենք ունեցած գիտելիքները, ավելացնում նորերը: Վերապատրաստումից հետո կլինեն վիրահատություններ, որոնք իրենց տեսակով ու բարդությամբ եզակի են ոչ միայն մեր կենտրոնում, այլև ամբողջ Հայաստանում»,- ասում է Հայկ Բաբայանը՝ կիսվելով Ֆրանսիայի Գյուստավ Ռուսի ուռուցքաբանական կենտրոնից ստացած տպավորություններով:
