Ուռուցքաբանության ազգային կենտրոնի տնօրեն Նարեկ Մանուկյանն ու փոխտնօրեն Արթուր Ավետիսյանը այցելել են Ֆրանսիայում ՀՀ դեսպանություն
Աշխատանքային այցով Փարիզում գտնվող ՀՀ ԱՆ Վ.Ա. Ֆանարջյանի անվան ուռուցքաբանության ազգային կենտրոնի տնօրեն Նարեկ Մանուկյանն տնօրենի տեղակալ Արթուր Ավետիսյանը ս.թ. նոյեմբերի 26-ի երեկոյան այցելել են Ֆրանսիայում Հայաստանի Հանրապետության դեսպանություն, հանդիպել Ֆրանսիայի Հանրապետությունում և Մոնակոյի Իշխանապետությունում Հայաստանի Հանրապետության արտակարգ և լիազոր դեսպան Հասմիկ Տոլմաջյանի հետ:
Հանդիպմանը դեսպան Հասմիկ Տոլմաջյանը ողջունել է հյուրերին և շնորհավորել Փարիզի Գյուստավ Ռուսի ուռուցքաբանական կենտրոնի և ՈՒԱԿ-ի միջև կնքված հուշագրի առթիվ:
Պարոն Մանուկյանը շնորհակալություն է հայտնել դեսպան Տոլմաջյանին հյուրընկալության և հուշագրի ստորագրման նախապատրաստման գործընթացում իր ակտիվ դերակատարության համար: ՈՒԱԿ-ի տնօրենը ընդգծել է ստորագրված հուշագրի կարևորությունը ինչպես ՈՒԱԿ-ի, այնպես էլ Հայաստանում ուռուցքաբանության ոլորտի զարգացման համար:
Հանդիպման ընթացքում զրուցակիցները հույս են հայտնել, որ այս հուշագրի շնորհիվ հայ և ֆրանսիացի բժիշկների միջև հաստատվող կապերը երկու կենտրոնների միջև փոխշահավետ գործընկերության ամուր հիմքեր կստեղծեն:
