ՈՒԱԿ-ում առաջին անգամ էնդոմետրիումի քաղցկեղ ախտորոշմամբ հիվանդին կատարվել է պահակային ավշային հանգույցների բիոպսիա
Կլիմատերիկ շրջանում գտնվող 67-ամյա կինը, գանգատվելով սեռական ուղիներից արյունային արտադրությունից, դիմել է Ուռուցքաբանության ազգային կենտրոն։ Կատարված հետազոտությունների (ՈՒՁՀ, ՀՇ, ՄՌՏ, արգանդի խոռոչի փայփլ բիոպսիա) արդյունքում պացիենտի մոտ ախտորոշվել է էնդոմետրիումի քաղցկեղի I փուլ։ Հետորովայնամզային տարածությունում փոփոխված, ախտահարված ավշահանգույցներ չեն հայտնաբերվել։
Ժամանակակից ուղեցույցների համաձայն բուժման մեթոդ է ընտրվել լապարասկոպիկ տոտալ հիստերէկտոմիան հավելումներով, պահակային ավշային հանգույցների բիոպսիա։
Կատարված վիրահատությունը հատուկ գունանյութի՝ ինդոցիանին կանաչի (ICG) օգնությամբ է իրականացվել, ինչի միջոցով մեծ ճշգրտությամբ հայտնաբերվում են պահակային ավշային հանգույցները, որոնց թիրախային հեռացումը հիվանդության ճիշտ փուլավորման հնարավորություն է տալիս։
Վիրահատությունը կատարել են Կանանց առողջության կլինիկայի ղեկավար Կարապետ Բազիկյանը, ասիստենտներ Գոհար Մկրտչյանը, Շահեն Փարսյանը, անեսթեզիոլոգ Սերգեյ Մարտիրոսյանը։
Մեթոդի կիրառման առավելություններն են՝
- պացիենտների վաղ ապաքինում,
- հետվիրահատական բարդությունների ցածր ռիսկ (լիմֆէդեմա, լիմֆոկիստա),
- մետաստատիկ ախտահարված լիմֆատիկ հանգույցների հայտնաբերման բարձր ճշգրտություն:
Պացիենտը վիրահատությունից հետո 4 օր անց բավարար վիճակում դուրս է գրվել կլինիկայից։Հետագա բուժումը նույնպես կշարունակվի ՈՒԱԿ-ում։
Հոգալով մեր պացիենտների կյանքի որակի մասին՝ մենք ամեն օր աշխատում ենք մեր մասնագիտական կարողությունների հարստացման ուղղությամբ:
