ՀՀ ԱՆ Վ․ Ա․ Ֆանարջյանի անվան Ուռուցքաբանության ազգային կենտրոնում կատարվել է ողնաշարի տրանսպեդիկուլյար կայունացման հերթական վիրահատությունը։

59 տարեկան կինը դիմել էր ՈՒԱԿ, գանգատվելով ողնաշարի ցավերից։ 2018 թվականին նրա մոտ ախտորոշվել էր կրծքագեղձի քաղցկեղ և կատարվել էր վիրահատություն։ Հետազոտությունները ցույց տվեցին, որ առկա են դեպի ողերը տարածվող մետաստազներ, ինչի պատճառով առաջացել է երկու ողերի ախտաբանական կոտրվածք։

Վիրահատությունը կատարեցին ՈՒԱԿ Նեյրոօնկոլոգիկան բաժանմունքի բժիշկներ՝ օրթոպեդ-ողնաշարաբան Կարապետ Անտոնյանը և նյարդավիրաբույժ Ռուբեն Հարությունյանը։ Կատարվեց մետաղական կոնստրուկցիաներով տրանսպեդիկուլյար կայունացում, որի նպատակն է բարելավել պացիենտի կյանքի որակը։ Կինը սկսել է քայլել վիրահատությունից երեք օր անց։

Վերականգնողական կարճ ընթացքից հետո նա արդեն ճառագայթային և քիմիաթերապևտիկ բուժում է ստանում։