Բարդ, մեծ ծավալի ու եզակի վիրահատություն ՈՒԱԿ-ում

ԱԽՏՈՐՈՇՈՒՄ

Բուժառուն եղել է մոլի ծխող։ Իր կյանքի 48 տարուց 35-ի ընթացքում ծխել է։ Ունեցել է նաև ալկոհոլի չարաշահման էպիզոդներ։ Այս ամենը հանգեցրել է լեզվի ուռուցքային գոյացության առաջացման, խոսքի և կլման խանգարման, կլման ժամանակ ցավերի։ 48 տարեկան տղամարդու մոտ ախտորոշվել է լեզվի քաղցկեղ։ Նա ՈՒԱԿ է դիմել լեզվի բավականին մեծ ախտահարմամբ, պրոցեսի մեջ էին ընդգրկվել նաև պարանոցի ավշային հանգույցները։

ՎԻՐԱՀԱՏՈՒԹՅՈՒՆ

Մանրակրկիտ հետազոտություններից հետո որոշվել է բուժումը սկսել վիրահատությամբ։ Ուռուցքաբանության ազգային կենտրոնում կատարվել է լեզվի, այսպես կոչված, ԿՈՄՊԱՐՏՄԵՆՏԱԼ հեռացում, այսինքն՝ լեզվի և պարանոցի ավշային հանգույցների հետ մեկ բլոկով հեռացվել են նաև լեզվի արտաքին մկանները, որոնք կազմում են բերանի հատակը (ստոծանին)։

Այսպիսի վիրահատությունը ժամանակակից ուռուցքային վիրաբուժության հրամայականն է։

Հեռացումից հետո՝ վիրահատության երկրորդ փուլում, ժամանակավոր տեղադրվել է շնչառության համար արտաքին փողրակ (կատարվել է տրախեոստոմիա), ապա հեռացված դեֆեկտը փակվել է մեծ կրծքամկանային լաթով (պարզ ասած՝ կրծքամկանի միջոցով ձևավորվել է լեզու, որը բուժառուի մոտ կատարելու է լեզվի ֆունկցիաները՝ մասնակցելու է ծամելու և կլման պրոցեսներին)։

ԴԵՊՔԻ ԱՌԱՆՁՆԱՀԱՏԿՈՒԹՅՈՒՆ

ԿՈՄՊԱՐՏՄԵՆՏԱԼ ԳԼՈՍԷԿՏՈՄԻԱՆ համարվում է գլխի և պարանոցի ուռուցքային վիրաբուժության նոր ուղղություն և ապահովում է ուռուցքային պրոցեսի լիակատար հեռացումը։

Նման վիրահատություն Հայաստանում կատարվում է հազվադեպ, այդ ծավալի և բարդության վիրահատության դիմում են քչերը։ Վիրահատությունը կատարել են Ուռուցքաբանության ազգային կենտրոնի Ընդհանուր և մանկական ուռուցքաբանության և ռեկոնստրուկտիվ վիրաբուժության բաժանմունքի բժիշկներ Մհեր Կոստանյանը, Արմինե Զարգարյանը, օրդինատոր Օֆսաննա Գարաքուլեանը, անեսթեզիոլոգ` Արշակ Հարությունյան։

ՎԻՐԱՀԱՏՈՒԹՅՈՒՆԻՑ ՀԵՏՈ

Հետվիրահատական շրջանը ընթացել է հարթ, առանց բարդությունների։ Հիվանդը արդեն բնականոն սնվում է, վերականգնվում են նաև մնացած ֆունկցիաները։ Հետվիրահատական շրջանում պլանավորվում է անցկացնել ճառագայթային բուժում։

Որպես ամփոփում Մենք կրկնում ենք և հորդորում՝ գնահատե՛ք ձեր առոջությունը, հեռու մնացե՛ք վնասակար սովորություններից, պարբերաբար հետազոտվե՛ք, ժամանակին դիմե՛ք բժշկի։