ՈՒԱԿ-ում անհնարին թվացողը բժիշկները դարձնում են իրականություն

67-ամյա իրաքցի կինը 20 տարի շարունակ փնտրել է իր խնդիրը լուծող բժշկին։ Ի վերջո, ճանապարհը նրան բերել է Հայաստան՝ Ուռուցքաբանության ազգային կենտրոն, որտեղից նա դուրս է եկել՝ մոռանալով իրեն տանջող ցավերն ու խնդիրները։

Կինը պատմում է, որ 2003 թվականին քարեր են ընկել մեջքին և ողի կոտրվածք է ստացել, որի մասին տեղի բժիշկները այդ պահին չեն հասկացել։ Կոտրվածքի մասին իմացել են միայն այն ժամանակ, երբ կինը հետազոտվել է արտասահմանցի բժիշկների Իրաք կատարծ այցի ժամանակ։

Հիվանդության բուժման համար պացիենտը սկսել է իր «ճանապարհորդությունը»․

• 2016 թվականին Հնդկաստանում վիրահատության է ենթարկվել, որից հետո ձախ ոտքում մշտապես թմրածության զգացում է եղել։
• Ապա վերականգնողական բուժումներ է ստացել Եգիպտոսում, Հորդանանում, Մալազիայում, Թուրքիայում․ այս եկրներից ոչ մեկում պացիենտի խնդիրը վերջնական լուծում չի ստացել։
• 2020 թվականին ոտքերում թուլության և քովիդի ազդեցությամբ առաջացած խնդիրների կապակցությամբ պացիենտը երկրորդ անգամ այցելել է Հնդկաստան և ենթարկվել երկրորդ վիրահատության, որի ժամանակ վերևից ներքև ֆիքսել են ողնաշարը, որն էլ կյանքի որակի վրա ազդել է։ Վիրահատությունից հետո պացիենտի մոտ նկատվել է մշտական թուլություն ու ցավ ոտքերում։
• 2023 թվականին, աղջկա ուսման նպատակով, միասին եկել են Հայաստան։ Այստեղ ևս փորձել են գտնել մասնագետ, որը կլուծեր խնդիրը և այցելել են Ուռուցքաբանության ազգային կենտրոն ՝ օրթոպեդ-ողնաշարաբան Կարապետ Անտոնյանին:

Մասնագետը նշում է, որ պացիենտի մոտ պարանոցային հատվածում առկա է եղել ստենոզ, որի կապակցությամբ 2023 թվականի հոկտեմբեր ամսին պացիենտը վիրահատվել է, սակայն, այդ վիրահատությունից հետո պացիենտի մոտ շարունակում էր մնալ 2016 թվականի տրավմայի հետևանքով առաջացած գանգատները, որոնց զուգակցվել էին նաև գոտկային հատվածում դեգեներատիվ տարիքային փոփոխություններից առաջացած նոր խնդիրները։

ՈՒԱԿ օրթոպեդ-ողնաշարաբանի խոսքով, հիվանդի մոտ եղել է ողնաշարի հետտրավմատիկ կիֆոտիկ դեֆորմացիա՝ հիվանդը քայլում էր դեպի առաջ կռացած, որն էլ բերել է սագիտալ դիսբալանսի։ 🩻Պացիենտի մոտ առկա դեֆորմացված ողը (կոտրված ողի շրջանում կիֆոզի անկյունը նորմայի 0 աստիճանի փոխարեն 24,4 աստիճան է եղել) որոշվել է կիֆոզը շտկելու համար ողը ռեզեկցել՝ 0 աստիճան ստանալու համար։ 2024 թվականի հունվարի 16-ին ՈՒԱԿ-ում իրականացվեց երկրորդ վիրահատությունը։ Հաշվի առնելով, որ արդեն կա հավաքված կոնստրուկցիա, դեֆորմացիան շտկելու համար կոնստրուկցիան երկարացվեց մինչև թորակալ 5 մակարդակ։

Կիֆոզի այդ աստիճանի շտկում ՈՒԱԿ-ում առաջին անգամ է իրականացվել։

Վիրահատությունը տևել է 8 ժամ, որի ընթացքում արյան կորուստը կրիտիկական մեծ չի եղել։ Մասնագետներն աշխատել են Cell Saver-ով, որի միջոցով վիրահատության ժամանակ արյան բաղադրամասերը ֆիլտրվում են և պատրաստ են նորից հիվանդին ներարկելու համար։

Խուսափելու համար նյարդաբանական շեղումներից` վիրահատությունն իրականացվել է մշտական նեյրոմոնիթորինգով, որի համար հատուկ խումբ է աշխատել։

Վիրահատարանում աշխատել են ՈՒԱԿ օրթոպեդ-ողնաշարաբան Կարապետ Անտոնյանը, նեյրովիրաբույժ Աննա Կիզոկյանը, կլինիկական օրդինատոր Մամիկոն Դանղյան, անեսթեզիոլոգ Արշակ Հարությունյանը։

Հիվանդը վիրահատությունից հետո` 4-5 օր անց, կարողացել է քայլել, իսկ 15 օր անց դուրս է գրվել հիվանդանոցային ստացիոնարից։

Այժմ նյարդաբանական որոշ բուժումներ պետք է անցնի խնդրի ամբողջական բուժման համար։

Իրաքցի պացիենտը նշում է, որ այցի առաջին օրվանից վստահում է ՈՒԱԿ բժիշկներին․ նրանք կարողացել են ճիշտ բացատրել իր խնդիրը և համոզված է՝ կավարտվի այս մղձավանջը:

ՈՒԱԿ-ի բժիշկնրեը չեն դադարում սովորել, վերապատրաստվել՝ մեր պացիենտներին լավագույն բժշկական ծառայությունները մատեցելու և վերջիններիս կյանքի որակի բարելավմանը նպաստելու համար։