61-ամյա կինը դիմել էր Ուռուցքաբանության ազգային կենտրոն՝ գանգատվելով մոտ երկու ամիս տևած սուր ցավերից՝ ողնաշարի ստորին կրծքային հատվածում։ Ախտորոշվել է ձախ կրծքագեղձի քաղցկեղ, անութային լիմֆատիկ հանգույցների, Th10 ողի ՄՏՍ ախտահարում, ողնաշարի սեգմենտար անկայունություն, ուռուցքի ներաճով դեպի ողնաշարային խողովակ։

Կատարվել է կրծքագեղձի բիոպսիա և դեղորայքային բուժում:

Այնուհետև, ցավերը մեղմելու նպատակով, քիչ ինվազիվ եղանակով իրականացվել է լամինէկտոմիա, ողնաշարային խողովակից ուռուցքի հեռացումով և Th9-Th11 պերկուտան տրանսպեդիկուլյար ֆիքսացիա։

  

Վիրահատությունն իրականացրել են ՈՒԱԿ Նեյրոօնկոլոգիական վիրաբուժության բաժանմունքի մասնագետներ՝ բժիշկ-վնասվածքաբան-օրթոպեդ Կարապետ Անտոնյանը, բժիշկ-նեյրովիրաբույժ Աննա Կիզոկյանը, անեսթեզիան ապահովել է Արշակ Հարությունյանը։

Մեթոդի առավելություններն են՝ հյուսվածքների քիչ տրավմատիզացիան, արյան մինիմալ կորուստը, կարճ վերականգնողական շրջանը, վերքերի արագ ապաքինումը, քիչ մահճակալ օրերը և ինֆեկցիոն նվազագույն ռիսկերը։

Վիրահատական միջամտությունը կրում էր հրատապ բնույթ․ քաղցկեղի բուժումն ընթանում էր, սակայն ողի քայքայումը չկանխելու դեպքում այն կարող է հանգեցնել ստորին վերջույթների թուլացման։ Վիրահատության շնորհիվ հնարավոր է եղել ապահովել ողնաշարի ֆունկցիոնալությունը։

Վիրահատությունն ընթացել է բարեհաջող։ Կինը 4-րդ օրը դուրս է գրվել հիվանդանոցից և այժմ շարունակում է ստանալ ճառագայթային բուժում ՈՒԱԿ Հեռահար ճառագայթային բաժանմունքում։

Հոգալով Ձեր առողջության մասին մեր մասնագետներն անում են առավելագույնը։