ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնի կլինիկական պաթոմորֆոլոգիայի բաժանմունքը համալրվել է նոր սերնդի ևս մեկ սարքով՝ LEICA ընկերության DM750 բազմաֆունկցիոնալ մանրադիտակով, որը ոչ միայն ապահովում է գոյացությունների հետազոտվող նմուշների բարձրորակ պատկերներ, այլև հնարավորություն է տալիս այդ պատկերները տեսանկարահանել։

Մանրադիտակն ունի համակցված մոդուլային թվային Leica ICC50 E տեսախցիկ ծրագրային ապահովումով, ինչը հնարավորություն է տալիս ստացված պատկերները պահպանել սարքի հիշողության մեջ, դուրս բերել էկրանի վրա, ինչպես նաև էլեկտրոնային տարբերակով ուղարկել այլ մասնագետների՝ երկրորդ կարծիք ստանալու նպատակով։

Ինչպես նշեց բաժանմունքի ղեկավար Զարուհի Հարությունյանը, մանրադիտակի այդ լրացուցիչ գարծառույթները հնարավորություն են տալիս հեռաբժշկության միջոցով բարդ դեպքերը քննարկել ինչպես հայաստանյան, այնպես էլ արտեկրի գործընկերների հետ։

«Սա կօգտագործվի ի շահ մեր պացիենտների։ Այսուհետ բոլոր բարդ դեպքերի վերաբերյալ մենք հնարավորություն կունենանք արագ ստանալ էքսպերտային երկրորդ կարծիք, ինչը կնպաստի ճշգրիտ ախտորոշմանը և բուժման ճիշտ մարտավարության ընտրությանը։ Մեր բոլոր գործողությունների նպատակը դա է․ ճշգրիտ ախտորոշում և բուժում», - ասաց նա։