2024-ն ՈՒԱԿ-ում․ ամփոփում է Արթուր Ավետիսյանը
ՈՒԱԿ փոխտնօրեն, կրծքագեղձի վիրաբույժ Արթուր Ավետիսյանը Հայաստանի Հանրային ռադիոյի «Ես առողջ եմ» հաղորդման եթերում անդրադարձել է կենտրոնի 2024-ի ձեռքբերումներին և առաջիկա անելիքներին, ամփոփել է կրծքագեղձի անվճար սքրինինգային ծրագրի արդյունքներն այս պահի դրությամբ, խոսել է ճառագայթային նոր մասնաշենքի բացման և պալիատիվ մոբիլ ծառայության գործարկման մասին։
Արթուր Ավետիսյանը առանձնակի շեշտել է, որ վերջին 5 տարում Ուռուցքաբանության ազգային կենտրոնի սարքավորումները համալրվել և վերազինվել են, մեծ նշանակություն է տրվել վերապատրաստումներին և շարունակական կրթությանը։
Հայկական ուռուցքաբանական 5-րդ կոնգրեսի մասին խոսելիս կենտրոնի տնօրենի տեղակալը կարևորել է նմանօրինակ միջոցառումների շնորհիվ բժշկագիտության ակադեմիական մասի առաջխաղացումը։
«Կոնգրեսին հրավիրում ենք այնպիսի մասնագետների, որոնց դասախոսություններին արտերկրում մասնակցելը մեծ ռեսուրս կպահանջեր։ Մեզ մոտ ոլորտի ներկայացուցիչներն այդ հնարավորությունը ստանում են անվճար»,-նշել է Արթուր Ավետիսյանը։
