Իրազեկված հասարակություն և մեծ վարպետության ձգտող բժիշկներ․ ՈՒԱԿ-ը ունի հաջողության իր բանաձևը
Յուրաքանչյուր բժիշկ ունի մեկ նպատակ՝ լինելու լավագույններից մեկը իր ոլորտում և տալու մարդկանց ապրելու ու կյանքը վայելելու հնարավորություն։ Այս ամենը հնարավոր է քրտնաջան աշխատանքի, սովորելու, կրթվելու և վարպետանալու շնորհիվ։
Ուռուցքաբանության ազգային կենտրոնում աշխատող բժիշկներն ունեն այդ հնարավորությունը։ Կենտրոնը, շնորհիվ իր վարած քաղաքականության և ձեռք բերած պայմանավորվածությունների, համագործակցության պայմանագրերի, տալիս է իր բժիշկներին վերապատրաստվելու, նոր գիտելիքներ ստանալու և աշխարհի լավագույն կենտրոններում փորձ ձեռք բերելու հնարավորություններ։
Մոսկվայի Բլոխինի անվան ուռուցքաբանության ազգային գիտահետազոտական կենտրոնում 2-շաբաթյա վերապատրաստում է անցել ՈՒԱԿ Կանանց առողջության կլինիկայի բժիշկ-ուռուցքաբան Լուսինե Ջիլավյանը։
Մամոլոգը վարպետացել է քաղցկեղի դեպքում կրծքագեղձի առաջնային ռեկոնստրուկցիաներում։
Երկու շաբաթ շարունակ բժիշկը Բլոխինի անվան ուռուցքաբանության ազգային գիտահետազոտական կենտրոնի մամոլոգիական բաժանմունքում մասնակցել է վիրահատությունների, նեղ մասնագիտական խորհրդատվությունների, ուսումնասիրել յուրահատուկ դեպքեր ու դրանց վիրաբուժական միջամտությունների տարբերակները, փորձով ու գիտելիքներով կիսվել բաժանմունքի շուրջ 15 մասնագետների հետ։
Լուսինե Ջիլավյանը շեշտում է. «ՈՒԱԿ-ն իր հնարավորություններով և ծառայություններով հետ չի մնում աշխարհի զարգացած այլ կենտրոններից։ Կրթելով և պատմելով կրծքագեղձի քաղցկեղի մասին՝ մենք կունենանք իրազեկված հասարակություն, որը չի վախենում այդ հիվանդությունից»:
