«Մվասի» (բևացիզումաբ)դեղով բուժում` քաղցկեղ ունեցող պացիենտների համար․ ծրագիրն իրականացվում է ԱՆ «Վ.Ա. Ֆանարջյանի անվան ՈՒԱԿ-ում
Քաղցկեղ ունենցող պացիենտներին անվճար կտրամադրվի մարդասիրական օգնությամբ ստացված «Մվասի» (բևացիզումաբ) դեղը` ըստ բժշկական ցուցումների, անկախ սոցիալական կամ հատուկ խմբերի ցանկում ընդգրկվածությունից
«Մվասի (բևացիզումաբ) լուծույթ ներերակային 25մգ/մլ 16մլ» և «Մվասի (բևացիզումաբ) լուծույթ ներերակային 25մգ/մլ 4մլ» դեղերով բուժման ծրագիրը կիրականացվի ԱՆ «Վ.Ա. Ֆանարջյանի անվան ուռուցքաբանության ազգային կենտրոնում»:
Ծրագրի շրջանակում ենթակա են բուժման`
- Մետաստատիկ կոլոռեկտալ քաղցկեղ՝ ֆտորպիրիմիդինների ածանցյալների հետ զուգակցված,
- Ոչ մանրբջջային և ոչ տափակբջջային թոքի քաղցկեղ՝ տեղային տարածված (ոչ վիրահատելի), ռեցիդիվող և մետաստատիկ փուլերում՝որպես 1-ին գծի թերապիա զուգակցված քիմիա և իմունաթերապիայի հետ,
- Տեղային տարածված կամ մետաստատիկ երիկամաբջջային քաղցկեղ՝ որպես մոնոթերապիա,
- Գլխուղեղի չարորակ նորագոյացություններ,մասնավորապես WHO grade 3 և 4 աստրոցիտոմաների և գլիոբլաստոմաների ժամանակ որպես մոնոթերապիա կամ համակցված քիմիապրեպարատների հետ,
- Ձվարանների,արգանդափողերի և որովայնամզի առաջնային քաղցկեղների դեպքում,թերապիայի 1-ին գծի ցուցումով քիմիաթերապիայի հետ համակցված՝IIIB IIIC ըստ FIGO-ի փուլավորման և մետաստատիկ պացիենտների դեպքում,
- Արգանդի վզիկի քաղցկեղ՝ IV փուլում, համակցված քիմիապրեպարատների հետ,
- Հեպատոցելյուլյար կարցինոմա՝ տեղային տարածված և մետաստատիկ փուլերում որպես 1-ին գծի թերապիա համակցված իմունաթերապիայի հետ:
Ծրագրում պացիենտների ընդգրկման համար անհրաժեշտ փաստաթղթերը`
- Պացիենտի էպիկրիզ,
- Պացիենտի անձնական տվյալներ, անձնագրի պատճեն կամ նույնականացման քարտի պատճեն,
- Պացիենտի կոնտակտային տվյալներ:
Ներկայացվող էպիկրիզում պարտադիր ներառվում են տվյալները ըստ հիվանդության փուլերի՝ համաձայն ուղեցույցերի:
Եթե կլինիկական փուլը համապատասխանում է, ապա սահմանվում է հետևյալ տվյալների պարտադիր առկայությունը՝
- Հիվանդության պատմության և բժշկական զննության նկարագիր,
- Համակարգչային շերտագրության (ն/ե կոնտրաստավորմամբ), անհրաժեշտության դեպքում ՄՌՇ և/կամ ՊԷՏ/ԿՏ հետազոտության տվյալները,
- Ուռուցքի պաթոհյուսվածաբանական տվյալները,
- Ուռուցքի իմունահիստոքիմիական տվյալները՝ ըստ անհրաժեշտության:
Ուղեկցող հիվանդությունների առկայության դեպքում տվյալ հիվանդության կարգավիճակը ճիշտ գնահատելու, դեղի հնարավոր կողմնակի ազդեցությունները կանխելու և/կամ վերահսկելու նպատակով իրականացվում են լրացուցիչ հետազոտություններ.
1) Արյան ընդհանուր քննություն,
2) Նյութափոխանակության համապարփակ հետազոտություն, այդ թվում` լյարդի և երիկամների ֆունկցիոնալ թեստեր:
Ծրագրում կարող են ընդգրկվել.
1) Առաջնային ախտորոշված վերոնշյալ նոզոլոգիաներով և փուլավորմամբ պացիենտները.
2) Այն պացիենտները, ովքեր նախկինում բուժում են ստացել «Վ.Ա. Ֆանարջյանի անվան ուռուցքաբանության ազգային կենտրոնում» կամ այլ բժշկական կազմակերպություններում և ներկայումս համապատասխանում են Ծրագրի չափորոշիչներին:
Հարցերի դեպքում կարող եք զանգահարել նշված հեռախոսահամարով` (010)205050:
