Նորաթուխ մայրիկը կրկին վայելում է մայրության բերկրանքը՝ առանց ցավի և անհանգստության. ՈՒԱԿ-ի մասնագետների կողմից իրականացվել է մեծ ծավալի բժշկական միջամտություն, որը հնարավորություն է տվել վերականգնել նրա առողջությունը և բարելավել կյանքի որակը։

Ուռուցքաբանության ազգային կենտրոն էր դիմել 22-ամյա պացիենտ Կ.Զ.-ն, ով գանգատվում էր պարանոցային աջ կեսի գոյացությունից, հաճախակի գլխապտույտներից:

Մինչ ՈՒԱԿ դիմելը պացիենտը զննություն էր անցել ՌԴ-ում, և իրականացված ՄՌՏ հետազոտության արդյունքներով նրա մոտ ախտորոշվել էր աջ քնային զարկերակի գոյացություն:

Արդեն այս տարեսկզբին ՈՒԱԿ Սերգեյ Սեինյանի անվան հենաշարժիչ համակարգի ուռուցքաբանության բաժանմունքում իրականացված լրացուցիչ հետազոտությունների (պարանոցի՝ դուպլեքս, կոնտրաստ անգիոգրաֆիա) արդյունքում պացիենտնի մոտ ախտորոշվել է երկկողմանի քնային զարկերակների խեմոդեկտոմա (պարագանգլիոմա)` աջից II-րդ տիպ, ձախից` I-ին տիպ:
Նախավիրահատական բոլոր հետազոտություններից հետո որոշվել է գնալ վիրահատական բուժման:

Փուլ 1
Մինչ բուն վիրահատությունը պացիենտն անցել է նախավիրահատական պատրաստություն, որն իրենից ներկայացրել է վարժանք Մատասի փորձի կիրառմամբ (ամեն օր սեղմվում է քնային զարկերակը` 1 րոպեից հասցնելով 25 րոպեի. յուրաքանչյուր օր ավելացվում է մեկական րոպե): Այս վարժանքի նպատակը կայանում է նրանում, որպեսզի անհրաժեշտության դեպքում հնարավոր լինի իրականացնել քնային զարկերակի ժամանակավոր փակում:

Փուլ 2
Նախապատրաստական փուլի հաջող ավարտից հետո իրականացվել է վիրահատական միջամտություն պարանոցի աջ կողմում:

Փուլ 3
Վիրահատությունից հետո պացիենտն անցել է երեքշաբաթյա ռեաբիլիտացիա, որից հետո կրկին իրականացվել է նախավիրահատական վարժանք (Մատասի փորձ):

Փուլ 4
Իրականացվել է երկրորդ վիրահատությունը` պարանոցի ձախ կեսից:

Վիրահատությունն իրականացրել են բժիշկ-դիմածնոտային վիրաբույժներ Սերգեյ Ղազանչյանն ու Հայկ Բաբայանը, անեսթեզիան իրականացրել է բժիշկ-անեսթեզիոլոգ-ռեանիմատոլոգ Կոնստանտին Մակարյանը:

Հետազոտություններն իրականացրել են ռադիոլոգներ Արմենուհի Գալստյանը, Նարինե Կրյուչկյանը և Արտյոմ Արտաշեսյանը, հյուսվածքաբաններ Նելլի Գրիգորյանն ու Յուլիա Ժիվոտյագինան: Բժշկական խորհրդատվություն են տրամադրել նեյրովիրաբույժ Աննա Կիզոկյանը և ներզատաբան Աննա Շահոյանը:

Այս դեպքի առանձնահատկությունը կայանում է նրանում, որ նման խնդիր հանդիպում է շատ հազվագյուտ դեպքերում և ավելի հազվագյուտ է հանդիպում, երբ խնդիրը միաժամանակ աջ և ձախ քնային զարկերակների շրջանում է:

Պացիենտն այժմ գտնվում է դինամիկ հսկողության տակ։