Սլովենիայում քաղցկեղի սքրինինգի փորձը՝ որպես լավագույն մոդել Հայաստանում հնարավոր ներդրման համար
2023 թվականի նոյեմբերի 20-24-ը Ուռուցքաբանության ազգային կենտրոնի փոխտնօրեն, ուռուցքաբան-վիրաբույժ Արթուր Ավետիսյանը, Առողջապահության նախարարության աջակցությամբ, մասնակցել է Սլովենիայում ԱՀԿ-ի կազմակերպած «Կրծքագեղձի, արգանդի վզիկի և կոլոռեկտալ քաղցկեղների սքրինինգի» գիտագործնական սեմինարին, որի նպատակն էր վերը նշված սքրինինգային ծրագրերի կազմակերպմանը և ներդրմանը վերաբերող հարցերի քննարկումը:
Նշենք, որ կրծքագեղձի, արգանդի վզիկի և կոլոռեկտալ քաղցկեղների սքրինինգային ծրագրերի շրջանակներում Սլովենիան հանդիսանում է ԵՄ առաջատար երկրներից մեկը: Եվ, քանի որ Սլովենիան իր բնակչությամբ և տարածքով շատ մոտ է Հայաստանին, այդ երկրի հաջողված սքրինինգային մոդելներն արդյունավետությամբ կարող են կիրառվել նաև Հայաստանում` նպաստելով հիվանդությունների առավել վաղ փուլերում հայտնաբերմանն ու արդյունավետ բուժմանը:
Այցի շրջանակում Արթուր Ավետիսյանը մի շարք կապեր և պայմանավորվածություններ է ձեռք է բերել Հայաստանում անցկացվող և ապագայում անցկացվելիք սքրինինգային ծրագրերի շրջանակում աջակցություն ստանալու վերաբերյալ: Նախանշվել են հետագա համագործակցության հիմնական ուղղություններն ու հնարավորությունները:
