Ուռուցքաբանության ազգային կենտրոնն այսօր իր դռներն էր բացել տարբեր բուժհաստատությունների ավելի քան 250 բուժքույրերի առջև
«Անգնահատելի է ձեր դերն ու նշանակությունը բժշկության մեջ, և հատկապես, հիվանդների ապաքինման գործում: Շնորհակալ ենք ձեր կատարած աշխատանքի համար: Շնորհավոր ձեր տոնը…». ՈՒԱԿ տնօրեն Նարեկ Մանուկյան 🗓 Ուռուցքաբանության ազգային կենտրոնն այսօր իր դռներն էր բացել տարբեր բուժհաստատությունների ավելի քան 250 բուժքույրերի առջև: Նպատակը՝ նշել Բուժքույրերի միջազգային օրն ու այս առիթն օգտագործել նոր գիտելիքներ ու հմտություններ ստանալու համար:
«Ուռուցքաբանության, արյունաբանության և պալիատիվ խնամքի Հայաստանի բուժքույրերի» միության կազմակերպած երկրորդ տարեկան կոնգրեսը ոլորտում եզակի է և լայնամասշտաբ: Այն հնարավորություն ընձեռեց մասնակիցներին քննարկելու այնպիսի թեմաներ, ինչպիսիք են միջին բուժանձնակազմի դերը պալիատիվ խնամքում, հիվանդի համար ապահով միջավայրի կազմակերպումը և բուժքրոջ դերը, հոգեսոցիալական աջակցությունը մանկական քաղցկեղի ոլորտում և այլն:
Բացման խոսքով հանդես եկավ ՈՒԱԿ տնօրեն Նարեկ Մանուկյանը: Վերջինս, շնորհավորելով բուժքույրերին իրենց տոնի առթիվ, առանձնացրեց. «Անգնահատելի է ձեր դերն ու նշանակությունը բժշկության մեջ, և հատկապես, հիվանդների ապաքինման գործում: Դուք անփոխարինելի եք ոլորտում, ուստի և շատ կարևոր է ձեր շարունակական կրթության ապահովումը: Շնորհակալ ենք ձեր կատարած աշխատանքի համար»:
Առողջապահութան փոխնախարար Արմեն Նազարյանն էլ, ողջունելով կոնգրեսի մասնակիցներին, շնորհավորեց նրանց մասնագիտական տոնի առթիվ և ևս մեկ անգամ կարևորեց բուժքույրերի անգնահատելի դերն առողջապահական համակարգում:
Տոնի առթիվ առողջապահության նախարար Անահիտ Ավանեսյանի անունից մի քանի բուժքույրեր ստացան շնորհակալագրեր առձնվեր աշխատանքի համար:
