Ուռուցքաբանության ազգային կենտրոնը շարունակում է իրականություն դարձնել տարեսկզբին իր առջև դրված նպատակները։ Ամենակարևորներից է ՈՒԱԿ-ում աշխատող մասնագետներին տալ արտերկրյա խոշոր կենտրոններում վերապատրաստվելու ու նոր գիտելիքներով զինվելու հնարավորություն։

Սեպտեմբերին Ռուսաստանի առաջատար կլինիկաներում երկշաբաթյա վերապատրաստման դասընթացների են մասնակցել ՈՒԱԿ-ի 3 մասնագետներ։

Նարեկ Գինոյանը նոր մասնագիտական գիտելիքներ ու հմտություններն է ձեռք բերել Ն.Ն.Բլոխինի անվան ուռուցքաբանության գիտաբժշկական կենտրոնի Ընդհանուր ուռուցքաբանության բաժանմունքում՝ «Կմախքի ոսկրերի առաջնային և մետաստատիկ ուռուցքներ» թեմայով։ Ուռուցքաբան օրթոպեդը մասնակցել է բաժանմունքում կատարվող մեծածավալ վիրահատություններին՝ կոնքի վերջույթների և ողնաշարի շրջանում, որոնց տևողությունը միջինում կազմել է 8-10 ժամ։ ՈՒԱԿ-ի բժիշկը Մոսկվայի մասնագետների հետ կատարել է կոնքի շրջանի բարդ ռեկոնստրուկտիվ վիրահատություններ, կոնքի էնդոպրոտեզավորումներ։

Կարինե Խոնդկարյանը նոր մասնագիտական գիտելիքներ ու հմտություններն է ձեռք բերել Մոսկվայի Բոդկինի անվան հիվանդանոցում՝ «հոդերի և փափուկ հյուսվածքների պաթոլոգիաների ուլտրաձայնային ախտորոշում» թեմայով ։ Երկշաբաթյա տևողությամբ դասընթացի ընթացքում ռադիոլոգը ստացել է ինչպես տեսական գիտելիքներ, այնպես էլ գործնականում կատարել մանր և մեծ հոդերի ՈՒՁ հետազոտություններ։ Ավարտին ՈՒԱԿ-ի մասնագետը հանձնել է քննություն և ստացել մասնագիտական վերապատրաստման վկայական։

Արթուր Առաքելյանը նոր մասնագիտական գիտելիքներ ու հմտություններն է ձեռք բերել Ն․ Ն.Պետրովի անվան ուռուցքաբանության ինստիտուտի Որովայնային ուռուցքաբանության բաժանմունքում՝ «Որովայնի լապարասկոպիկ վիրատահատություններ» թեմայով։ Վիրաբույժը մասնակցել է բաժանմունքում կատարվող վիրահատություններին, բուժման պլանավորումներին, հետվիրահատական բարդությունների բուժումներին։ ՈՒԱԿ-ի մասնագետը ներկա է գտնվել նաև լապարասկոպիկ եղանակով ուղիղ աղու մասնահատման դասընթացին։ 

Ստացած նոր գիտելիքները մասնագետները արդեն իսկ ծառայեցնում են ի շահ ՈւԱԿ-ի բուժառուների։