Բացառիկ դեպք ՈՒԱԿ-ում ՝ մասնագետները կարողացել են ճիշտ ախտորոշել ստամոքսի խիստ հազվադեպ հանդիպող քաղցկեղային պաթոլոգիայի՝ ստամոքսի հեպատոիդ ադենոկարցինոմայի դեպքը։ 


ԱԽՏՈՐՈՇՈՒՄ

57-ամյա տղամարդը դիմել էր Ուռուցքաբանության ազգային կենտրոն՝ գանգատվելով էպիգաստրիալ շրջանում բութ ցավերից և սրտխառնոցից։

Բուժառուն ՀՀ այլ բուժհաստատությունում անցել էր պոլիօրգան ՀՇ հետազոտություն, էզոֆագոգաստրոսկոպիա, բիոպտատի հյուսվածաբանական քննություն, որի արդյունքում ախտորոշվել էր ստամոքսի G2 ադենոկարցինոմա։ Վիրահատական բուժում ստանալու նպատակով բուժառուն ուղղորդվել էր ՈՒԱԿ։

Հուլիս ամսին ՈՒԱԿ Որովայնային և էնդովիրաբուժության բաժնի մասնագետները՝ բժիշկ-ուռուցքաբան Արմեն Նիկողոսյանի գլխավորությամբ կատարել են ստամոքսի սուբտոտալ վիրահատություն։ Ուռուցքն ամբողջությամբ հեռացվել է։



Հետվիրահատական ձևաբանական քննությամբ ստամոքսում հայտնաբերվել էր խոցոտված գոյացություն 4,5*4,0սմ չափերով, որը ախտահարում էր ստամոքսի լորձաթաղանթն ու մկանային շերտը։ Դիտվել է նաև վեց ռեգիոնար ավշահանգույցների մետաստատիկ ախտահարում։
ՈՒԱԿ Կլինիկական պաթոմորֆոլոգիայի բաժանմունքի բժիշկ-հյուսվածքաբան Նելլի Գրիգորյանը դրել է ցուցում և ապա կատարել է իմունոհիստոքիմիական հետազոտություն, որի ընթացքում պարզ է դարձել, որ առկա է ստամոքսի հեպատոիդ ադենոկարցինոմա։

   


Հեպատոիդ ադենոկարիցինոման խիստ հազվադեպ հանդիպող, չարորակ, արտալյարդային ուռուցք է, որը ձևաբանորեն և իմունոֆենոտիպով նմանակում է հեպատոցելուլյար կարցինոմային (լյարդի քաղցկեղ), սակայն ունի ավելի ագրեսիվ ընթացք, վատ կանխատեսում և բուժական այլ մոտեցումներ։

ԱՌԱՆՁՆԱՀԱՏԿՈՒԹՅՈՒՆ

Հեպատոիդ ադենոկարցինոման խիստ հազվադեպ հանդիպող քաղցկեղային պաթոլոգիա է, այն կազմում է ստամոքսի քաղցկեղների 0,3–2,0%-ը։
Ունի ավելի ագրեսիվ ընթացք, ավշահանգույցների և լյարդի վաղ մետաստազավորվելու հակվածություն։
Հիվանդության առաջացման մեխանիզմները դեռևս անհայտ են։