Հայաստանի տեսարժան վայրերից մեկում` Ջերմուկ քաղաքում մեկնարկեց Հայկական ուռուցքաբանական IV կոնգրեսը, որն այս տարի անց է կացվում «Հայկական ուռուցքաբանություն. ձեռքբերումներ և նպատակների նոր սանդղակներ» խորագրի ներքո: 

Բացման հանդիսավոր արարողությանը Առողջապահության նախարար Անահիտ Ավանեսյանը, ողջունելով կոնգրեսի մասնակիցներին, նշեց, որ վերջին տարիներին Հայաստանն արձանագրել է մեծ հաջողություններ քաղցկեղի դեմ պայքարի շրջանակներում. «Մենք ունենք առաջին անգամ հայտնաբերված դեպքերի թվի աճ, մահացության թվի նվազում»։

Նախարարի խոսքով՝ ցուցանիշները հուսադրող են, բայց չպետք է բավարարվել այդ արձանագրումներով. «Կառավարության և Առողջապահության նախարարության առաջիկա տարիների ամենամեծ ռեֆորմը պետք է լինի առողջապահական համապարփակ ապահովագրությունը, որը և պետք է փորձի ամբողջական լուծումներ տալ քաղցկեղի դեմ պայքարին»։

Անահիտ Ավանեսյանն ընդգծեց, որ կարևորվում է միջազգային հաղորդակցությունն ու համագործակցությունները, որոնք հնարվոր են դառնում նաև այս կոնգրեսի շնորհիվ: 

ՈւԱԿ տնօրեն Նարեկ Մանուկյանը հանդես գալով ողջույնի խոսքով՝ ևս նշեց, որ վերջին 4 տարում Հայաստանում ուռուցքային հիվանդություններից մահացության թիվը նվազել է 6,4 %-ով։

Նարեկ Մանուկյանը ընդգծեց, որ նման արդյունքի Հայաստանում կարողացել ենք հասնել շնորհիվ՝

• մշտապես վերապատրաստումներ անցնող մասնագետների,
• 2019 թվականից գործող պետական աջակցության ծրագրերի, 
• բուժհաստատությունների կողմից ուռուցքաբանությանը կարևորություն տալուն։

Խոսելով Հայկական ուռուցքաբանական 4-րդ կոնգրեսի անցկացման վայրի ընտրության մասին ՈՒԱԿ տնօրենն ասաց՝ «Ջերմուկ քաղաքն ընտրվել է ցույց տալու համար, որ մենք ամուր կանգնած ենք մեր հողի վրա և ցանկացած խնդրի դեպքում մի քանի ժամվա ընթացքում կլինենք մեր սիրելի Ջերմուկում»։ 

ՈւԱԿ տնօրենը հաջողություն և արգասաբեր աշխատանք մաղթեց կոնգրեսի մասնակիցներին: 

Բացման արարողությունը՝ bit.ly/3Ou6m9Z