Հարգելի հայրենակիցներ,

Սիրելի բուժառուներ և բուժաշխատողներ,

2024 թվականի արդյունքներն ամփոփելով՝ ուրախությամբ արձանագրում եմ, որ Ուռուցքաբանության ազգային կենտրոնը շարունակում է բարձրացնել իր առջև դրված նշաձողը՝ քայլ առ քայլ դառնալով ավելի զարգացած և հասանելի բժշկական կենտրոն: Համաշխարհային առաջընթացից հետ չմնալով՝ մենք շարունակում ենք կենտրոնը հագեցնել նոր սարք-սարքավորումներով, հետևում ենք միջազգային ընդունված չափանիշներին և ներդնում մեր բուժհաստատությունում, համագործակցում ենք աշխահում հայտնի լավագույն մասնագետների հետ և փորձի փոխանակմամբ ստացած նոր մեթոդները կիրառում բուժառուների արդյունավետ բուժման ընթացքն ապահովելու և կյանքի որակի բարձրացման համար:

Ուռուցքաբանության ազգային կենտրոնն առանցքային նշանակություն է տալիս հանրության իրազեկվածությանը՝ քաղցկեղի վաղ փուլում հայտնաբերման կարևորությունը շեշտելով: Զանգվածային լրատվական միջոցների մեր գործընկերների հետ աշխատանքը, համացանցային ակտիվությունը և շարունակական տեղեկատվական արշավները մեկ թիրախ ունեն՝ ձեր առողջ կյանքի ընթացքը:

Ամենամյա միջոցառումների կազմակերպմամբ նույնպես կենտրոնը փորձում է նպաստել Հայաստանում ոլորտի զարգացմանը՝ հարթակ տրամադրելով թե՛ ուսանողներին, թե՛ ոլորտում կայացած մասնագետներին, թե՛ կրտսեր և միջին բուժանձնակազմին: Հատկանշական է, որ այս համատեքստում առանձնակի կարևորում ենք Հայկական ուռուցքաբանական կոնգրեսը: 2025-ին 5-րդ հոբելյանական մեծ միջոցառումը բժշկական տոն է լինելու Հայաստանի և աշխարհի ուռուցքաբանության ոլորտի մասնագետների համար՝ հնարավորություն տալով վեր հանել խնդիրներն ու լուծման ուղիներ առաջարկել:

2025 թվականին ՈւԱԿ մեծ ընտանիքի հետ համատեղ մեր առջև դրել ենք նոր ու հավակնոտ ծրագրերի տեսլականը և հաջողության հասնելու ճանապարհային քարտեզը ձեր վստահության և առողջությունը առաջնահերթություն դարձնելու պատրաստակամության ուղիներով է անցնում: Գալիք տարում մենք չենք դադարելու կատարելագործվել և մեր տեղն ու դիրքն ամրապնդել աշխարհի լավագույն կենտրոնների ցանկը համալրելու համար:

Հարգելի հայրենակիցներ,

թող 2025-ը լինի կայուն արժեհամակարգի պահպանման, խաղաղության, ընտանեկան ներդաշնակության և առողջության տարի: Նոր տարին թող ամոքի ցավերն ու թույլ տա մանկան պարզությամբ հավատալ և սպասել հրաշքների:

Սիրելի բուժառուներ և բուժաշխատողներ,

Նոր տարում թող ձեր փոխադարձ վստահությունը կյանքեր փրկելու, առողջության բանաձևերը գտնելու բանալին դառնա, և թող հաջողության պատմությունները բժշկագիտության ոլորտում արտացոլեն հայաստանյան առողջապահության ոլորտի շարունակական առաջընթացը:

Շնորհավոր Ամանոր և Սուրբ Ծնունդ:

Նարեկ Մանուկյան

Ուռուցքաբանության ազգային կենտրոնի տնօրեն