Ուրախ էինք ՈւԱԿ պրոֆեսոր Հայրապետ Գալստյանի անվան դահլիճում հյուրընկալելու Մանկական ուռուցքաբանության միջազգային միության ասիական 15-րդ համաժողովի (SIOP Asia 2023) շրջանակում անցկացվող Ճառագայթային բժշկությանը վերաբերող սեսիան, որը վարում էին ՈւԱԿ Հեռահար ճառագայթային թերապիայի բաժանմունքի ղեկավար Թաթուլ Սաղաթելյանը և դոկտոր Գերտ Յանսենսը: 

Ողջույնի խոսքով հանդես եկավ ՈՒԱԿ տնօրենի գիտական գծով խորհրդական Գագիկ Բազիկյանը: Վերջինս շնորհակալություն հայտնեց նման միջոցառման կազմակերպման համար, իսկ ներկաներին մաղթեց արդյունավետ համաժողով:

Միջոցառման հիմնական բանախոսներն էին՝

• Բժիշկ Թեոդորուն, ով ներկայացրեց VMAT տեխնիկան, ինչը համեմատաբար նոր է համարվում ոլորտում:
• Բժիշկ Քուրեշին, ով ներկայացրեց զարգացող երկրներում ճառագայթային բուժման մարտահրավերներն ու առաջընթացը:
• Բժիշկ Յանսենսը, ով ներկայացրեց ճառագայթային բուժումը Վիլմսի ուռուցք ունեցող անձանց շրջանում, որը մանկական ուռուցքաբանության մեջ տարածված տարատեսակ է:

Միջոցառման ընթացքում զեկույցներով հանդես եկան ոլորտի մի շարք այլ մասնագետներ ևս, քննարկվեցին ճառագայթային բժշկության արդի խնդիրները: ℹ️Հիշեցնենք, որ Հայաստանը մայիսի 18-21-ը հյուրընկալելու է մանկական ուռուցքաբանության համաշխարհային առաջատար մասնագետների, բժշկական և ուսումնական հաստատությունների ղեկավարների, որոնք հանդես կգան զեկույցներով ու դասախոսություններով ոլորտի ամենաարդի թեմաներով:

Համաժողովի համակազմակերպիչներն են՝ Երևանի Մխիթար Հերացու անվան պետական բժշկական համալսարանը, Հայաստանի մանկական քաղցկեղի և արյան հիվանդությունների կենտրոնը, որը հանդիսանում է ՀՀ ԱՆ պրոֆ․ Ռ․Հ․ Յոլյանի անվան Արյունաբանական կենտրոնի մաս, Իմունաուռուցքաբանության գիտահետազոտական ​​ինստիտուտը (IMMONC) և Սիթի օֆ Սմայլ բարեգործական հիմնադրամը։

Համաժողովն անց է կացվում ՀՀ Առողջապահության նախարարության աջակցությամբ։

Համաժողովի գլխավոր հովանավորներն են Agenus բիոտեխնոլոգիական ընկերությունը (ԱՄՆ) և Team Telecom Armenia ընկերությունը։