ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնում այսօր վերաբացվեց վերանորոգված Ճառագայթային ուռուցքաբանության բաժանմունքը։

Բացման արարողությանը ներկա էին Առողջապահության նախարար Անահիտ Ավանեսյանը, փոխնախարարներ Լենա Նանուշյանը և Արմեն Նազարյանը, ԱՆ գլխավոր քարտուղար Վարդուհի Գրիգորյանը:

Բաժանմունքում շրջայցի ընթացքում ՈւԱԿ տնօրեն Նարեկ Մանուկյանը և բաժանմունքի ղեկավար Թաթուլ Սաղաթելյանը նախարարին ներկայացրեցին իրականացված շինարարական և նորոգման աշխատանքները։ Թաթուլ Սաղաթելյանը նշեց, որ ամբողջովին վերափոխվել են բաժանմունքի արտաքին տեսքը և հիվանդների կեցության պայմանները։ Հաջորդ փուլով նախատեսվում է նոր տեխնոլոգիական մասնաշենքի կառուցում և երկու գերժամանակակից գծային արագացուցիչների ձեռքբերում։

Պատասխանատուների հավաստմամբ վերանորոգված բաժանմունքում բուժառուներին մատուցվում են ժամանակակից ստանդարտներին համապատասխան բժշկական ծառայություններ, որոնց զգալի մասն իրականացվում է պետպատվերի շրջանակում:

Հյուրերը եղան նաև Պալիատիվ ծառայության և Ռադիոլոգիական մասնաշենքերի շինհրապարակներում, շրջայց կատարեցին Կենտրոնով, ծանոթացան մեծ դահլիճի, ներհիվանադոցային դեղատան ընթացող վերանորոգման աշխատանքներին: Եղան նաև ադմինիստրատիվ մասում, որի պատերի վրա լուսանկարներով ներկայացված է ՈւԱԿ-ի ողջ պատմությունը։

Առողջապահության նախարար Անահիտ Ավանեսյանը նշեց, որ ՈւԱԿ-ը որպես ազգային կենտրոն պետք է լինի իրապես ազգային, և նախարարությունը շարունակաբար ջանք է գործադրում դրա համար։ «75-ը լուրջ տարիք է, և շատ կարևոր է տեսնել Կենտրոնի երիտասարդացումը և զարգացումը, և շատ կարևոր են այդ լուսանկարները, քանի որ դրանց միջոցով պահպանվում է պատմությունը: Կարևոր է, որ ամեն սերունդ իր ներդրումն ունենա, առաջընթաց ապահովի և հանձնի հաջորդ սերնդին։ Այդպես է կառուցվում Կենտրոնը, այդպես է կառուցվում երկիրը», - ասաց նախարար Ավանեսյանը` Կենտրոնին մաղթելով նորանոր աշխատանքային հաջողություններ։

ՈւԱԿ-ի տնօրեն Նարեկ Մանուկյանը շնորհակալություն հայտնեց Առողջապահության նախարարությանը, նշելով, որ առանց նախարարության շարունակական աջակցության Կենտրոնն այսպիսի առաջընթաց չէր ունենա։

Նշենք, որ 2020 թվականից ՈւԱԿ-ում իրականացվում են մեծածավալ շինարարական և վերանորոգման աշխատանքներ, որոնց շնորհիվ լիովին փոխվել է հին, 40-ամյա շենքի ներքին տեսքը։

Այսօրվա հիվանդանոցային պահանջներին համապատասխան արդեն նորոգվել ու վերազինվել են Կենտրոնի բոլոր կլինիկական բաժանմունքները, ձեռք է բերվել 100-ից ավելի սարք-սարքավորում: Ընթացքում են ադմինիստրատիվ մասի բարեկարգման աշխատանքները, շարունակվում է 2021 թվականին մեկնարկած նոր՝ Պալիատիվ ծառայության և Ռադիոլոգիական մասնաշենքերի շինարարությունը։