ՈՒԱԿ բժիշկ-վիրաբույժ Ավետ Պետրոսյանը չորսշաբաթյա վերապատրաստում է անցել Ֆրանսիայի Գյուստավ Ռուսի ուռուցքաբանական կենտրոնում
Արդյունավետ կառավարում = նոր վերելքներ
Ուռուցքաբանության ազգային կենտրոնի որովայնային և էնդովիրաբուժության բաժանմունքի բժիշկ-վիրաբույժ Ավետ Պետրոսյանը չորսշաբաթյա վերապատրաստում է անցել Ֆրանսիայի Գյուստավ Ռուսի ուռուցքաբանական կենտրոնում:
Ավետ Պետրոսյանը աշխարհում ուռուցքաբանական կենտրոնների առաջատար հնգյակում իր ուրույն տեղը զբաղեցնող Գյուստավ Ռուսի ուռուցքաբանական կենտրոնում մասնակցել է վիրահատություններին, փորձարկել տեղի վիրահատական գերժամանակակից սարք-սարքավորումները, ժողովների ընթացքում մասնակցել հիվանդությունների դեպքերի քննարկումներին, առանձին հիվանդների բուժման մեթոդների ընտրություններին, ծանոթացել հետվիրահատական շրջանի առանձնահատկություններին:
Չորսշաբաթյա վերապատրաստումը Ուռուցքաբանության ազգային կենտրոնի բժշկին հնարավորություն է տվել ծանոթանալու ֆրանսիական կենտրոնի աշխատանքային առանձնահատկություններին, բուժման մեթոդներին, հիվանդների հանդեպ մոտեցումներին, ձեռք բերել մասնագիտական նոր գիտելիքներ, հմտություններ, յուրացնել նոր մեթոդներ:
Մասնագետի այս վերապատրաստումը ՈւԱԿ-ին հնարավորություն է տալու զարգացնել որովայնային բաժանմունքի մատուցած ծառայությունների շարքը, ավելացնել լապարասկոպիկ վիրահատությունների ծավալներն ու երկրում ներդնել նոր՝ գերժամանակակից վիրահատական մեթոդներ:
«Մենք ունենք բոլոր հնարավորությունները` չզիջելու առաջատար կենտրոններին: Վերապատրաստումների այս հնարավորությունները մեծ դռներ են բացում ինչպես կենտրոնի բժիշկների, այնպես էլ երկրում ուռուցքաբանության զարգացման համար»,-ասում է Ավետ Պետրոսյանը:
