Հոգալով ոչ միայն մարմնի, այլ նաև հոգու առողջության մասին

Արդեն 1 տարի Ուռուցքաբանության ազգային կենտրոնի Պալիատիվ ծառայության կլինիկայում գործում է հոգեսոցիալական ծառայության թիմ (հոգեբաններ, հոգեբույժ, սոցիալական աշխատող), որն ամենօրյա աշխատանք է անցկացնում ինչպես պացիենտների, այնպես էլ վերջիններիս հարազատաների հետ: Ծառայության գործունեության առանցքում «պալիատիվ խնամքը կյանքի մասին է» գաղափարախոսությունն է:

Հոկտեմբերին ծառայության ղեկավարը և կլինիկական հոգեբաններն այցելել են Լոնդոնի Սուրբ Քրիստոֆեր հոսպիս և մասնակցել այնտեղ կազմակերպված բազմամասնագիտական ակադեմիային:

Սուրբ Քրիստոֆերն առաջին ժամանակակից հոսպիսն է, որը ստեղծել է պալիատիվ խնամքի ուղղության հիմնադիր Սեսիլիա Սոնդերսը։ Նա պալիատիվ խնամքի հիմքում դրել է մարդակենտրոնության սկզբունքը` կարևորվել է անհատն ու իր ընտանիքը․ բուժառուն ևս թիմի մաս է և մասնակցում է որոշումների կայացմանը: 

Սուրբ Քրիստոֆեր հոսպիսում գտնվելու ընթացքում մեր մասնագետներն իրականացրել են կլինիկական զուգայցեր, ունկնդրել դասախոսություններ, ձեռք բերել գործնական հմտություններ, ծանոթացել պալիատիվ խնամքի ժամանակակից մոտեցումներին, այդ թվում՝ վերականգնողական պալիատիվ խնամքի սկզբունքներին, որի հիմնական առանձնահատկությունն ու գլխավոր խնդիրն է պացիենտի ակտիվ ներգրավվածության միջոցով հնարավորինս երկար պահպանել վերջինիս ֆունկցիոնալությունը:

Այցի շրջանակում քննարկվել են նաև հետագա համագործակցության հնարավորություններն ու հիմնական ուղղությունները:

ԼԻՑԵՆԶԻԱ Կ-Բ0-002684․ տրված՝ 12․02․2020թ․։