120 կին, քաղցկեղի 4 նոր դեպք, ֆիբրոզ օջախներ, ֆիբրոադենոմա, տարատեսակ այլ խնդիրներ: 

Վերջին մեկ ամսվա շաբաթ օրերը Ուռուցքաբանության ազգային կենտրոնի Ախտորոշման ծառայության համար աշխատանքային էին: Պատճառը կանանց համար կենտրոնի անցկացրած ԱՆՎՃԱՐ հետազոտոթյուններն էին:

Կանանց տոների շրջանակում՝ մարտի 8-ից ապրիլի 7-ը՝ յուրաքանչյուր շաբաթ օր, 40 տարեկանից բարձր կանայք հնարավորություն ստացան անցնելու մամոգրաֆիա և կանխարգելելու Հայաստանում կանանց շրջանում ամենատարածված չարաբաստիկ հիվանդությունը՝ կրծքագեղձի քաղցկեղը: Հետազոտությունների արդյունքում, ցավոք, շատերի մոտ հայտնաբերվել են տարատեսակ խնդիրներ: Գերակշռող էին ֆիբրոզ-կիստոզ-մաստոպաթիաները, ֆիբրոադենոմաները:

Առաջին լուսանկարում տիկին Թամարան է, որն անցկացվող ակցիայի մասին տեղեկացել է ընկերուհու շնորհիվ: Երկար-բարակ մտածելուց հետո որոշել է գալ և հետազոտվել: Ասում է՝ սկզբում չէր ուզում, վախենում էր, թե «մի բան կհայտնաբերվի»: Հետո հետազոտության կարևորությունը հաղթել է վախին, ու տիկին Թամարան եկել է ստուգման: Վերջինս արդեն հանգիստ կգնա տուն. վստահ է, որ առողջ է:

Նմանատիպ օրինակները շատ են: Բայց, ցավոք, կան նաև նրանք, ովքեր այդպես էլ չեն գալիս, չեն հետազոտվում, իսկ առողջական խնդիրը բարդանում է, հաճախ դառնում կյանքի համար վտանգավոր:

Ուռուցքաբանության ազգային կենտրոնը ևս մեկ անգամ հորդորում է պարբերաբար անցնել հետազոտություններ, ստուգվել, կանխարգելել չարաբաստիկ հիվանդությունը:

Սկզբնական շրջանում կրծքագեղձի քաղցկեղը կարող է ընդհանրապես չդրսևորվել: Այդ իսկ պատճառով յուրաքանչյուր կին կանխարգելման նպատակով պետք է պարբերաբար հետազոտվի։ Ոչ բարդ, անցավ, երկար ժամանակ չպահանջող հետազոտությունը կարող է պահպանել առողջությունը, փրկել կյանքեր։