8 ժամ տևած վիրահատությունը հաջողությամբ ավարտվել է․ տղամարդու թուշը վերականգնվել է կրծքամկանի լաթով

ԱԽՏՈՐՈՇՈՒՄ

42 տարեկան տղամարդը դիմել է Ուռուցքաբանության ազգային կենտրոն գանգատվելով բերանի բացման սահմանափակումից, ձախ թշային շրջանում չլավացող վերքի առկայությունից։ Հետազոտության արդյունքում պարզ է դարձել, որ առկա է թշի լորձաթաղանթի տեղային տարածված տափակբջջային քաղցկեղ, որը ներաճել էր դեպի դուրս՝ մաշկ, և հետ՝ ծամիչ մկան:

Արդյունքում, բուժառուն բերանը կարողանում էր բացել 1-2 մմ-ի չափով։

Տղամարդն ունեցել է ալկոհոլի և ծխախոտի մեծ քանակի օգտագործման պատմություն, որն էլ պատճառ է դարձել քաղցկեղի առաջացման։ Մասնագետներին դիմել է բավականին բարձիթողի վիճակում՝ ուռուցքի առաջացումից մոտ 2 տարի անց։

ՎԻՐԱՀԱՏՈՒԹՅՈՒՆ

Հունիսի 25-ին՝ 8 ժամ տևած վիրահատության ժամանակ հեռացվել են պարանոցի ձախ կեսի ավշային հանգույցները, որոնցից 7-ում առկա են եղել երկրորդային մետաստազներ։ Ավշային հանգույցների հեռացման ընթացքում պահպանվել են գրեթե բոլոր նյարդերը, երակներն ու զարկերակները։ Ուռուցքի հեռացման ժամանակ հեռացվել է թուշն ամբողջ հաստությամբ, ստորին ծնոտի ճյուղի կեսի և ծամիչ մկանի հետ միասին։

Վիրահատության արդյունքում ձախ թշային շրջանում առաջացել է 9*8 սմ-ի չափով դեֆեկտ, որի շտկման համար կա՛մ պետք էր կիրառել ազատ լաթ, որը ծխողի դեպքում կարճ կյանք կարող էր ունենալ, կա՛մ պտտվող լաթ՝ մարմնի այլ հատվածից։ Որոշում է կայացվել կրծքավանդակի առաջային պատից վերցնել մեծ կրծքամկանը մաշկային կղզյակով, իր զարկերակով ու երակներով և պտտելով պարանոցում նախորոք պատրաստված թունելում՝ տեղադրել թշային շրջանի դեֆեկտի տեղում։

Վիրահատությանը մասնակցել են ՈՒԱԿ Սերգեյ Սեինյանի անվան ոսկրային ուռուցքաբանության բաժանմունքի դիմածնոտային վիրաբույժ Հայկ Բաբայանը, անեսթեզիոլոգ Կոնստանտին Մակարյանը, ասիստենտ Սերգեյ Ղազանչյանը:

ԴԵՊՔԻ ԱՌԱՆՁՆԱՀԱՏԿՈՒԹՅՈՒՆԸ

Ինտուբացիան իրականացվել է վիդեոֆիբրոսկոպի միջոցով՝ քթից մուտք գործելով դեպի շնչափող, որի շնորհիվ խուսափել են տրախեոտոմիայից։

Վիրահատությունը հնարավոր չէր կատարել առանց ռեկոնստրուկցիայի՝ բերանի խոռոչի կողմնային պատին առկա էր բացվածք, որն անհրաժեշտ էր շտկել գերճշգրիտ ռեկոնստրուկցիայի միջոցով, որպեսզի հետագայում դեֆեկտի շտկման համար կիրառված լաթը սնուցման հետ կապված խնդիրներ չունենար։ Հենց նման խնդրից խուսափելու համար է ընտրվել պտտվող լաթի կիրառումը։



ՀԵՏՎԻՐԱՀԱՏԱԿԱՆ ՇՐՋԱՆ

Վիրահատությունից հետո 3 օր պացիենտը սնվել է նազոգաստրալ զոնդի միջոցով, այնուհետև սկսել է սնվել բերանով. 7-րդ օրը դուրս է գրվել հիվանդանոցից։

Առաջիկայում պլանավորվում է իրականացնել քիմիա-ճառագայթային համակցված բուժում։