Գյումրիում տեղի ունեցավ «Երևան-Շիրակ ուռուցքաբանական ֆորումը»
ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնը, կարևորելով բժշկական ծառայությունների շարունակական զարգացումը, ՀՀ մարզերում նախաձեռնել է գիտագործնական միջոցառումների և գիտաժողովների շարք, որը կրում է «Ուռուցքաբանական ֆորում» անվանումը:
Առաջին ֆորումը՝ «Երևան-Շիրակ ուռուցքաբանական ֆորումը», տեղի ունեցավ Գյումրու տեխնոլոգիական կենտրոնում: Ֆորումի բացմանը ողջույնի խոսքով հանդես եկան ՈՒԱԿ տնօրեն Նարեկ Մանուկյանը, Գյումրի ԲԿ-ի տնօրեն Արմեն Իսահակյանը: Ներկա էր նաև Շիրակի փոխմարզպետ Կարեն Մանուկյանը:
Ֆորումի ընթացքում զեկույցներով հանդես եկան ՈւԱԿ-ի բոլոր բաժանմունքների ղեկավարները, ովքեր մարզային գործընկերների հետ կիսվեցին իրենց փորձով, տարբեր գիտաժողովների, մասնագիտական որակավորումները բարձրացնող վերապատրաստումների ընթացքում ձեռք բերած գիտելիքներով:
«Երևան-Շիրակ ուռուցքաբանական ֆորումին» մասնակցել են շուրջ 100 մասնագետներ՝ ՀՀ Շիրակի մարզում մասնագիտական գործունեություն ծավալող ուռուցքաբաններ, վիրաբույժներ, ռադիոլոգներ, ԱԱՊ օղակի բժիշկներ, առողջապահության կառավարման և կազմակերպման մասնագետներ և այլ՝ հարակից մասնագիտացումներով բժիշկներ։ Ֆորումի բոլոր մասնակիցներին կշնորհվի հավաստագրեր՝ ՇՄԶ 4 տեսական կրեդիտով:
Նման ֆորումների կազմակերպման նպատակներն են Հայաստանի ուռուցքաբանության ոլորտում առկա և հասանելի ծառայությունների մասին մարզային բուժաշխատողների իրազեկվածության բարձրացումը, Հայաստանի ուռուցքաբանության ոլորտում ձեռքբերումների և ուղենշվող զարգացումների հետ ծանոթացումը, ինչպես նաև ՈՒԱԿ-ում իրականացվող բացառիկ վիրահատությունների ու մատուցվող ծառայությունների ներկայացումը։
