ՀՀ Առողջապահության նախարարն այցելել է Ուռուցքաբանության ազգային կենտրոն
Հունիսի 6-ին Ուռուցքաբանության ազգային կենտրոնում էր ՀՀ Առողջապահության նախարար Լևոն Ալթունյանը։ Նախարարը շրջեց կենտրոնի թե՛ արդեն բարեկարգված և թե՛ դեռևս վերանորոգման փուլում գտնվող բաժանմունքներով, ծանոթացավ կենտրոնի տեխնիկական բազային, մասնավորապես՝ վերջին տարիներին ձեռքբերված բժշկական ժամանակակից սարքավորումներին։
Համայցից հետո նախարարը հանդիպեց ՈւԱԿ-ի աշխատակազմի հետ: Հանդիպման ընթացքում կենտրոնի տնօրեն Արմեն Տանանյանը ներկայացրեց վերջին երեք տարիներին բուժհաստատության գրանցած առաջընթացն ու ձեռքբերումները, ունեցած հաջողությունները, ինչպես նաև առկա խնդիրները, որոնք սպասում են լուծման իրենց հերթին:
Նախարար Լևոն Ալթունյանը ողջունեց կատարված բարեփոխումները` խոստովանելով, որ հաճելի անակնկալի է եկել ու տպավորված է իրեն ներկայացված արդյունքներով, ապա պատասխանեց կենտրոնի բուժաշխատողներին հուզող հարցերին:
Ամփոփելով հանդիպումը՝ ՈՒԱԿ-ի տնօրեն Արմեն Տանայանն ընդգծեց, որ կենտրոնն աշխատում և շարունակելու է աշխատել իրենց կողմից որդեգրած «ի շահ հիվանդին, բժշկին և պետությանը» սկզբունքով։
Լևոն Ալթունյանը նշեց նաև, որ այս ձևաչափով հանդիպումները ամենամյա բնույթ կկրեն:
